Полиция үлэһиттэрэ быраабы араҥаччылыыр атын уорганнары кытта «Нелегальнай мигрант» эпэрээссийэ бастакы түһүмэҕин түмүктээтилэр.
СӨ ИДьМ-тын пресс-сулууспата иһитиннэрбитинэн, өрөспүүбүлүкэ үрдүнэн барыта 2345 эбийиэги бэрэбиэркэлээбиттэр: ол иһигэр, 1092 олорор дьиэни, 204 омуктар тоҕуоруһар сирдэрин, 22 промышленность эйгэтигэр, 54 тутуу эйгэтигэр, 13 тыа хаһаайыстыбатын эйгэтигэр, 273 атыы-тутуу эйгэтигэр, 160 олох-дьаһахха хааччыйыы эйгэтигэр, 528 тырааныспарга, 114 общепит, онтон да атын 89 эйгэҕэ.
Эпэрээссийэ кэмигэр барыта 1950 омук киһитин бэрэбиэркэлээбиттэр.
Ол түмүгэр, миграционнай сокуону кэһии эйгэтигэр 230 административнай кэһии булуллубут, ол иһигэр: Российскай Федерация сиригэр-уотугар сылдьыыга – 179, үлэлиир быраабылалары тутуспат буолууга – 27, миграционнай учуокка турууга сымыйа сибидиэнньэлэри биэриигэ — 24.
Итинтэн дойду сириттэн-уотуттан 20 омук киһитин утаарбыттар.
Маны сэргэ, РФ Холуобунай кодексатын 322.3 ыстатыйатынан холуобунай дьыалалар тэриллибиттэр. Ол эбэтэр, омук киһитин учуокка сымыйанан туруоруу бэлиэтэ баарынан. Маннык дьыалалар Дьокуускайга, Нерюнгрига, Алдаҥҥа, Мэҥэ Хаҥаласка тэриллибиттэр, Өймөкөөн улууһугар бэрэбиэркэ бара турар.
Биһиги корр., «Саха сирэ» хаһыат, edersaas.ru
Хаартыска: интэриниэттэн.