Бу сайын “Демография” национальнай бырайыак соруктарын толорор сыалтан, “Уһун үйэлэнии уонна доруобай олоҕу уһатыы” эрэгийиэннээҕи бырайыак чэрчитинэн, медицинскэй-социальнай уонна суһал социальнай өҥөлөрү оҥорор 14 мобильнай биригээдэ тэриллибитэ.
Ол курдук, федеральнай бүддьүөттэн кэлбит 11 400,00 тыһ. солк. суумалаах 14 массыына атыылаһыллан, улуустарынан тарҕатыллыбыттара. Алдан, Амма, Үөһээ Бүлүү, Эдьигээн, Мэҥэ Хаҥалас, Мииринэй, Муома, Нам, Нерюнгри, Аллараа Халыма, Сунтаар, Чурапчы, Бүлүү, Хаҥалас улуустарыгар мобильнай биригээдэлэр тэриллибиттэрэ. Кинилэр Үлэ, социальнай сайдыы министиэристибэтин иһинэн үлэлииллэр.
Кэнники өссө эбиллэн, билигин 20 биригээдэ баар. Соторутааҕыта Дмитрий Медведев тыа сиригэр кыаммат, кырдьаҕас дьону балыыһаҕа тиэйэргэ анаан, эбии массыыналары атыылаһарга сорудах биэрбитэ. Ол чэрчитинэн, федеральнай бүддьүөттэн Саха сиригэр 19,9 мөл. солк. тиксибитэ.
Маннык биригээдэлэр соҕотох олорор кырдьаҕастарга, инбэлииттэргэ көмөлөһөр соруктаахтар. Холобур, ыраах бөһүөлэккэ олорор кырдьаҕаһы балыыһаҕа киллэриэхтэрин сөп. Көмөҕө наадыйар дьону булар, кыһалҕаларын быһаарсарга көмөлөһөр, балыыһалары кытары бииргэ үлэлэһэр, социальнай өҥөлөрү оҥорор сыаллаахтар.
Ангелина Васильева, “Саха сирэ” хаһыат, edersaas.ru