Ил Дархан Айсен Николаев этэринэн, Уһук Илин эрэгийиэҥҥэ 2%-наах ипотека бырагыраамата олоххо киирдэҕинэ, табыгастаах усулуобуйа тэриллэн, Саха сиригэр эдэр дьон олохсуйуута, атын куораттартан анал үөрэхтээх исписэлиистэр көһөн кэлиилэрэ улаатыаҕа.
Дойду аҕа баһылыга Владимир Путин Судаарыстыбаннай Сэбиэт мунньаҕар 2%-наах ипотека бырагырааматын киллэрэр туһунан эппитэ.
«Бу мин эрэ толкуйум буолбатах. Бу – Уһук Илини уонна Артиканы сайыннарар, итиэннэ атын министиэристибэлэр эппиэттээх үлэһиттэрин, эрэгийиэннэр салайааччыларын, анал үөрэхтээх дьон буолан бииргэ үлэлэһэн, элбэхтик дьүүллэһэн кэлбит түмүкпүт”, — диэн Айсен Николаев быһаарар.
“Дойду аҕа баһылыга маннык түргэнник быһаарыныыны ылыныа диэн күүппэтэхпит. Ол курдук, сарсыныгар тута Владимир Путин эдэр ыалларга 2% -наах ипотека быйыл олоххо киирэрин туһунан эппитэ.
Билигин, биллэн турар, бэлэм докумуоннар суохтар. Онон хас саастаах эдэр дьон, төһөнү, хас сылга, хайдах ылалларын туһунан чопчу этэр кыаҕым суох. Биири этиэхпин сөп – чэпчэтилээх ипотеканан Уһук Илиҥҥэ, ол иһигэр Саха сиригэр олорор эдэр ыаллар туһаныахтара.
Уһук Илини уонна Артиканы сайыннарар министиэристибэ Владимир Путин бу сорудаҕынан дьарыктана сылдьар. Онон сотору кэминэн барыта чопчу быһаарылыннаҕына, иһитиннэрии оҥоруохпут”, — диэн Ил Дархан тоһоҕолоон бэлиэтээтэ.