2,5 тыһыынча киһи идэтин таһымын үрдэтиниэҕэ

Бөлөххө киир:

Саха сиригэр үлэтэ суох сылдьар дьоҥҥо  сөптөөх болҕомто өрүү ууруллар. Ол курдук, үлэтэ суох сылдьар 2,5 тыһыынча киһини хаттаан үөрэтиэхтэрэ уонна идэлэрин таһымнарын үрдэтиэхтэрэ.  Бу түмүгэр,  экэниэмикэни оҥорор хампаанньалары олохтоох каадырынан хааччыйыыга сөптөөх үлэ ыытыллыаҕа диэн  СӨ Бырабыыталыстыбатын бэрэссэдээтэлэ Андрей Тарасенко  миниистирдэр, улуус баһылыктара кыттыылаах мунньахха иһитиннэрдэ.

«Билиҥҥи сааҥсыйалартан уонна экэнэмиичэскэй хааччахтан сылтаан,  тутуу уонна бырамыысыланнай хампаанньалар  оробуочай илии тиийбэтин ордук биллилэр.  Ол түмүгэр,  2021 сыллааҕыны кытта тэҥнээтэххэ, үлэтэ суох буолуу 0,4 %-нан үрдээбит. Көрөрбүт курдук, оннук айылаах үрдээбэтэх эрээри, дьон үлэтэ суох буолуута тахса турар.  Онон бу кыһалҕаны быһаарыахпытын наада, ону хайдах быһаарарбыт биллэр. Үлэтэ суох сылдьар дьону саҥа идэлэргэ үөрэтиэхпитин наада», — диэн Андрей Тарасенко эттэ.

Үлэлээх буолууга судаарыстыбаннай кэмитиэтин салайааччыта Елена Калашников иһитиннэрбитинэн, 2022 сылга үлэнэн хааччыйааччылар сайаапкаларынан «Бырамыысыланнаска – олохтоох каадыры» бырайыак чэрчитинэн, 500 киһини бырамыысыланнаска ордук наадалаах идэлэргэ үөрэтэр былааннаахтарын туһунан иһитиннэрдэ.

СӨ Бырабыыталыстыбата олохтоох хампаанньалары кытта ыччакка билигин ханнык идэлэр ордук наадаларын ыйан-кэрдэн биэриигэ эмиэ үлэлиир. Холобур, эдэр исписэлиистэр  үс ыйга диэри атын хампаанньаларга стажировканы ааһалларыгар  болҕомто ууруллар. Ону тэҥэ, быйыл 37 исписэлииһи материальнай өттүнэн өйүүргэ бүддьүөттэн 3 мөл солк. тыырыллыбыт. Тустаах бырайыакка кыттар  улахан хампаанньалар бэйэлэрин суоттарыгар эдэр дьону стажировкаҕа ыыталлар. Холобур, былырыын 1000 кэриҥэ исписэлиис идэтин таһымын үрдэппит.

«Бырамыысыланнаска – олохтоох каадыры» бырайыакка 43 эрэ хампаанньа кыттар. Ааспыт сылга  бырайыак чэрчитинэн, Саха  сириттэн 11  тыһ. киһи үлэнэн хааччыллыбыт, бу 2020 сыллааҕы көрдөрүүтээҕэр 2 тыһ. элбэх. Бырайыак үлэтэ кэҥиир, 4 хампаанньа эбиллэн биэрдэ уонна бу тэрилтэлэр 4900 киһини үлэнэн хааччыйыахтара.

Санатар буоллахха, Ил Дархан Айсен Николаев Үлэлээх буолууга судаарыстыбаннай кэмитиэтэ сааҥсыйа кэмигэр,  үлэнэн хааччыллыыны кытаанах хонтуруолга туталларыгар  сорудахтаабыта.  Саамай сүрүнэ,  быраамысыланнай хампаанньаларга олохтоох дьон үлэлииллэригэр сөптөөх болҕомто ууруллуохтааҕын ыйбыта.

Александр Тарасов, «Саха сирэ».

+1
0
+1
0
+1
0
+1
0
+1
0
+1
0
+1
0