Ааспыт ыйга Бүлүүгэ уонна Үөһээ Бүлүүгэ «АЛРОСА» хампаанньа үлэ көрдүүр дьоҥҥо анаан тэрээһин ыыппыта. Манна 320 үлэ миэстэтэ тахсыбыта. Үөһээ Бүлүүгэ 163, Бүлүүгэ 139 киһи кэлэн туох үлэ баарын билистэ. Үлэ дьаарбаҥкатыгар хас биирдии киһиэхэ ханнык үлэ барсарын, туох үөрэх баарын ыйан-кэрдэн биэрдилэр.
edersaas.ru
2018 сыл тохсунньу 30 күнүгэр «АЛРОСА» хампаанньа уонна СӨ Нэһилиэнньэ дьарыктаах буолуутун судаарыстыбаннай кэмитиэтэ «Олохтоох дьону – бырамыысыланнаска» бырайыагы олоххо киллэрэргэ 2018-2022 сылларга бииргэ үлэлэһэргэ сөбүлэһии түһэрсибиттэрэ. Бу сөбүлэһии чэрчитинэн, куоракка уонна тыа сиригэр үлэтэ суох дьону бырамыысыланнаска сыһыарарга араас тэрээһиннэри ыыталлар. 2018 сылга уопсайа 950 олохтоох дьон үлэнэн хааччыллыбыта, ол иһигэр баахта ньыматынан уонна сезонунан үлэҕэ – 418 киһи, тыа сириттэн – 332 киһи, 259 киһи — 30 диэри саастаах эдэр дьон.
Хампаанньа үлэһиттэри бэлэмниир киинигэр уонна Мииринэйдээҕи тиэхиньиичэскэй колледжка 110 киһи үөрэнэн, саҥа идэ ылбыта. «Олохтоох дьону – бырамыысыланнаска» бырайыагы олоххо киллэрэргэ, дьону үөрэттэрэргэ СӨ бүддьүөтүттэн уонна «АЛРОСА» көмөтүнэн 3 мөлүйүөн солкуобай ороскуоттанна.
Тыа сириттэн бырамыысыланнаска киирбит дьон саҥа эйгэҕэ, саҥа үлэлэригэр түргэнник үөрэнэллэрин туһугар 2018 сылтан хампаанньа уһуйааччылары сыһыаран биэрэн, табыгастаах усулуобуйа тэрийэр.
2018 сылга ыам ыйыгар уонна ахсынньыга ыытыллыбыт үлэ дьаарбаҥкатыгар Удачнайдааҕы, Мииринэйдээҕи хайаны байытар кэмбинээт, «Алмаздортранс» суол-ииһи тутар управление кыттыбыттара. Бу тэрээһиҥҥэ «Сургутнефтегаз», «Якутскэнерго», «Восточная Горнорудная Компания», «Селигдар көмүһэ», «Дальполиметалл» о.д.а. улахан хампаанньалар үлэ көрдөөччүлэри кытта кэпсэппиттэрэ.
Дьаарбаҥка түмүгүнэн бырамыысыланнаска киириэн баҕалаах 350 тахса киһи араас хайысханан эбии үөрэххэ суруттарбыттара, онтон 100 тахсата үлэнэн хааччыллыбыта.
Уопсайа 2017-2019 сылларга
4 309 өрөспүүбүлүкэ төрүт олохтоох дьоно «АЛРОСА» хампаанньаҕа үлэлии киирбитэ, ол иһигэр 720 киһи баахта ньыматынан, 323 киһи — кылгас болдьохтоох үлэҕэ.
Марианна Тыртыкова, «Саха сирэ», edersaas.ru