Ааспыт сылга СӨ доруобуйа харыстабылыгар киирэр мэдиссиинэ тэрилтэлэрэ уопсайа 1,5 миллиард солкуобай суумалаах анал тэрилинэн хааччылыннылар. Ону тэҥэ, коронавируснай инфекцияны утары охсуһууга 800 мөлүйүөн солкуобай суумалаах анал тэрил атыылаһылынна.
Быйыл доруобуйа харыстабылын бастакы сүһүөҕүн саҥардыы бырагырааматын чэрчитинэн, Арктика улуустара 275 мөлүйүөн солкуобай суумалаах мэдиссиинэ тэрилинэн хааччыллыахтара.
—Билигин доруобуйа харыстабылын иннигэр турар соруктарынан мэдиссиинэ көмөтө киһиэхэ табыгастаах, чугас буолара, киниэхэ анаан үлэлиирэ буолар. Саха сирин ханнык баҕарар олохтооҕо ханна да олордор, үрдүк квалификациялаах мэдиссиинэ көмөөтүн тута ылыахтаах. Онуоха балыыһалар эмиэ аныгы тэрилинэн хааччыллыбыт буолуохтаахтар, — диэн Айсен Николаев бэлиэтиир.
Балыыһаларга 8 рентген томографтара ылыллыбыттара, онтон биэһэ Томпо, Горнай, Нам, Уус Алдан, Чурапчы улуустарын киин балыыһаларыгар туруорулуннулар.
“Доруобуйа харыстабыла” национальнай бырайыак “Сүрэх-тымыр ыарыыларын утары охсуһуу” федеральнай бырайыагын чэрчитинэн, Мэҥэ Хаҥаластааҕы киин балыыһа көмпүүтэрдээх рентген томограбынан хааччылынна. Бу томограф көмөтүнэн үрдүк хаачыстыбалаах снимоктары ылаллар.
РФ бырабыыталыстыбатын хаһаас пуондатыттан кислороднай станциялар атыылаһыллан, Мэҥэ Хаҥалас, Мииринэй киин балыыһаларыгар, Национальнай мэдиссиинэ киинигэр, 2-с №-дээх Өрөспүүбүлүкэтээҕи балыыһаҕа, 3-с №-дээх өрөспүүбүлүкэтээҕи килиниичэскэй балыыһаҕа, Дьокуускайдааҕы килиниичэскэй балыыһаҕа бэрилиннилэр.
2022 сылга доруобуйа харыстабылын үбүлээһинэ үрдээн, 23 миллиард 760 мөлүйүөн солкуобайга тэҥнэстэ. Онон өрөспүүбүлүкэ мэдиссиинэ тэрилтэлэрин материальнай-техническэй базаларын бөҕөргөтөр үлэ салҕаныа.
Ангелина Васильева, “Саха сирэ” хаһыат, edersaas.ru
Хаартыска: sakhagov.ru