Күндү Сахабыт сирин олохтоохторо, биир дойдулаахтарбыт, доҕотторбут, бииргэ үөскээбит үөлээннээхтэрбит!
Быйыл сайын төрөөбүт дойдубутугар өтөрүнэн буолбатах уот кураан бүрүүкээн, ойуур баһаардара тураннар, мөлүйүөнүнэн гектардаах тыа былаҕайга былдьаммытын, улахан хоромньу тахсыбытын бары билэ-көрө сылдьабыт. Ол баһаардары бохсууга, умуруорууга, уот дьон олорор сиригэр суоһаабатын хааччыйарга ким туох кыахтааҕынан сыралаһан үлэлээтибит, үлэлии да сылдьабыт! Ол курдук, эр дьон уоту умуруорабыт, ийэлэр-эбээлэр ас астааннар аһаталлар, сорохтор харчы, туттар сэп-сэбиргэл хомуйан көмө тэрийиитигэр үлэлииллэр.
Ил Дархаммыт Айсен Николаев атырдьах ыйын 16 күнүгэр «күөх экранынан» быһа биэриигэ тахсан, дьоһуннаахай этиини оҥордо. «Уоту утары охсуһуу барыбытын сомоҕолоото, билигин үлэбит быһаарыылаах түһүмэҕэр кэллэ. Ол эрээри баһаары барытын умуруордубут дииргэ эрдэ, кэлэр сылларга уот ааҥнаабатын мэктиэлиир кыах суох… Онон сарсыҥҥы күммүт туһунан бука бары толкуйдуох тустаахпыт», — диэн барыбытыгар сыал-сорук туруорда. Климат уларыйыытын учуоттаан, айылҕабытын саҥа ньымаларынан араҥаччылыырга үөрэниэхтээхпитин бэлиэтээтэ.
Ил Дархан уонна Бырабыыталыстыба кыһамньыларынан, биллэн турар, тустаах үлэ-хамнас тэриллиэҕэ, федеральнай киинтэн да көмө кэлиэҕэ. Ол эрээри, ону миэстэҕэ олоххо киллэрии биһигиттэн бэйэбититтэн улахан тутулуктаах буолуоҕа.
Ватсаап, фейсбук курдук социальнай ситимнэргэ салалта мөлтөҕүттэн ойуур баһаардара турбуттарын, ол иһин уоту умуруоруу кыаллыбатын туһунан араас баһааҕырдар ис хоһоонноох сымыйа суруктар «дьаарбайаллар», ол олус хомолтолоох, иэдээн кэмигэр туора турбатах дьон ааҕарыгар. Манныктары төрдүттэн бопсуохха! Биһиги сомоҕолоһуубутун көрдүгэн уотун курдук сии сыппатыннар! «Өнүйбэт ыал сүөһүтэ харсыык буолар», «аҕатын үөҕэр ыал ыһыллар», «эрин кытары бэрт былдьаһар дьахтар олоҕун үрэйэр» диэн өбүгэлэрбит дириҥ ис хоһоонноох этиилэрин умнумуоҕуҥ! Ил Дархаммыт тула күүскэ түмсүөҕүҥ!
Бастатан туран, ыксаллаах быһыы-майгы эрэсиимэ уһулунна да, олорор сирдэрбитинэн далааһыннаах субуотунньуктары тэрийиэҕиҥ: хас өрөбүл ахсын бука бары тахсаммыт умайбыт тыаларбытын, алаастарбытын-сыһыыларбытын сылбах мастартан, куруҥнартан ыраастыаҕыҥ, бөһүөлэктэрбитин өрө тардыаҕыҥ! Баһаартан сэрэхтээх буолуу дьаһалларын күүһүрдүөҕүҥ!
Онон, САХАБЫТ СИРИН БАРЫ ВЫПУСКНИКТАРА БУ БАЧЫЫМЫ ӨЙДҮӨХТЭРЭ-ӨЙҮӨХТЭРЭ ДИЭН ТУРАН ЫҤЫРАБЫТ!
1980-1991 сыллардаахха оскуоланы бүтэрбиттэр түмсүүлэрин сүрүннээччилэр:
Охлопкова Саргылаана Михайловна – 1980,
Фёдоров Иван Юрьевич – 1981,
Егоров Павел Егорович – 1981,
Тогуллаев Евгений Афанасьевич – 1982,
Рехлясова Анна Алексеевна – 1982,
Соров Альберт Михайлович – 1983,
Фомина Анна Михайловна – 1983,
Степанов Ростислав Иванович – 1984,
Васильев Алексей Николаевич – 1985,
Антонова Лилиана Ивановна – 1985,
Павлова Туйаара Гаврильевна – 1986,
Гуляев Михаил Николаевич – 1987,
Николаева Ирина Степановна -1987
Кобяков Григорий Андреевич – 1988,
Ермолаева Майя Михайловна – 1989,
Петров Алексей Дмитриевич – 1990,
Иванова Ульяна Афанасьевна – 1990,
Яковлев Алексей Алексеевич – 1990,
Шишигина Зоя Алексеевна – 1991.
2021 сыл, атырдьах ыйын 18 күнэ.