Бүгүн, от ыйын 8 күнүгэр, өрөспүүбүлүкэ успуордун устуоруйатыгар бэлиэ күн буолла. Горнай Бэрдьигэстээҕэр буола турар «Манчаары оонньууларын» кэмигэр «Чыпчаал» стадиоҥҥа кыргыттарга кылыыга Саха сирин саҥа рекорда олохтонно.
Рекорду Хаҥалас улууһуттан күрэхтэһэр 18 саастаах Валерия Олесова олохтоото. Кини үһүс ыстаныытыгар 25 миэтэрэ 36 см бэлиэҕэ тиийэн, «Манчаары оонньууларын» бастакы рекордун оҥорон чөмпүйүөннээтэ. Бу көрүҥҥэ иккис Чурапчыттан Ньургуйаана Смирникова (23,28 м), үһүс Дьокуускайтан Дарья Добрынина (22,52 м) буоллулар.
Валерия Дьокуускайдааҕы педагогическай колледж бастакы кууруһун бүтэрбит эбит. «Кылыы тиэхиньикэтин чочуйдахха, дьаныардаахтык дьарыктаннахха, өйдүүн-санаалыын сааһыланнахха ситиһии кэлэр дии саныыбын. Бэһис кылаастан чэпчэки атлетканан дьарыктанан саҕалаабытым, оттон атах оонньууларынан иккис сылбын эрчиллэбин. Бастакы тириэньэрбинэн Вера Контоева буолар, билигин Максим Оегостуровка дьарыктанабын. Ыстаҥа бары көрүҥнэрин сатыыбын, ол эрээри кылыы миэхэ ордук табыллар.»Манчаары оонньууларыгар» рекорд оҥорор, кыайар сыаллаах этим, онон сыалбын ситиһэн үөрэн-көтөн турабын. Кыайыыбын эбээбэр, төрөппүттэрбэр, тириэньэрдэрбэр аныыбын», — диэн өрөспүүбүлүкэ саҥа рекордсмена Валерия Олесова санаатын үллэһиннэ.
Айтана Аммосова, edersaas.ru
Ааптар хаартыската.