Саҥа оскуолабыт тэлгэһэтигэр, 2017-2018 үөрэх дьылыгар оскуоланы бүтэрээччилэргэ анаммыт аллеяҕа быйыл күһүн хатыҥнары олортубут. Мастары Сайсары уокурук үлэһиттэрэ (начаалынньык М.В.Сыромятников) аҕалбыттара. Былырыын күһүн Ботаническай сад уонна СӨ Тыатын хаһаайыстыбатын министиэристибэтэ көрбүт араҕас акацияларын олорпуттара.
edersaas.ru
Оттон саас оскуола кэлэктиибэ, оҕолор бары көмөлөөн декоративнай үүнээйилэринэн киэргэппиппит. Уопсайа 0,5 га көҕөрдүллүбүт сир баар. Күһүн тутуспутунан оскуолабыт тэлгэһэтин ыраастаатыбыт, сыыс отун үргээтибит.
Экология сылын чэрчитинэн, оскуолабытыгар “Уу күнэ”, “Көтөр күнэ”, “Сир күнэ” диэн үгэскэ кубулуйбут аахсыйалары тэрийдибит. Манна үөрэнээччилэр уруһуй, быраҕыллыбыт матырыйааллары туһаҕа таһаарар куонкурустарга кытынныбыт. Ол түмүгэр, кылаастартан талыллыбыт бастыҥ үлэлэр “Отходы в доходы” диэн өрөспүүбүлүкэтээҕи научнай-практическай кэмпириэнсийэҕэ кыттан, 2 истиэпэннээх дипломнарынан наҕараадаланнылар.
Муус устарга эмиэ Экология сылынан сибээстээн, бүтүн нэдиэлэ биллэриллибитэ, экологическай олимпиада тэриллибитэ. Ол түмүгэр, Лейла Измайлова (6 кылаас), Вячеслав Макаров (7 кылаас), Жамилия Батыгова, София Чередник (8 кылаас) кыайыылаахтарынан ааттаммыттара. Ону таһынан уруһуй куонкуруһа, викторина, электричество уотун, ууну харыстааһыҥҥа лиэксийэлэри тэрийбиттэрэ. Сыллата “Эдэр эколог” куруһуок үлэлиир. Кинилэр экология хайысхатынан ыытыллар бары тэрээһиннэргэ көхтөөхтүк кыттар оскуола сүрүн хамаандата буолар. Үөрэнээччилэр 2000 сыллартан саҕалаан, куоракка тэриллэр экологияҕа сыһыаннаах олимпиадаларга өрүү миэстэлэһэллэр. Куруһуогу биология, экология учуутала Раиса Васильевна Макеева салайар. Сыл аайы оскуола, төрөппүттэр бары кыттар “Күһүн бэлэҕэ” дьаарбаҥканы тэрийэбит.
Герман ПАССАР, Жамилия БАТЫГОВА, Дьокуускай куорат 18-с оскуолатын 9-с кылааһын үөрэнээччилэрэ.