От ыйын 1 күнүгэр буолуохтаах Төрүт Сокуоҥҥа уларытыылары киллэрэр куоластааһын туһунан Нам улууһун Ленскэй нэһилиэгин баһылыга Андрей Новгородов санаатын үллэстэр:
— Нам улууһун Ленскэй нэһилиэгэр кулун тутарга куоластааһыҥҥа бэлэмнэнии үлэтин дьаһайар бөлөх тэрийбиппит. Манна дьаһалта үлэhиттэрэ, кулууп, Олоҥхо дьиэтин салайааччылара уонна нэһилиэк уопсастыбаннай Сэбиэтиттэн киирбиттэрэ.
Нэһилиэккэ 6214 быыбаардааччы баар диэн испииһэк оҥоһулунна. Сэттэ учаастактааҕы быыбардыыр хамыыһыйаҕа барыта 49 улуустааҕы быыбардыыр хамыыһыйа чилиэнэ, ону таһынан 30-тан тахса киһи эрэсиэрбэ быһыытынан үлэлиэхтэрэ. 178 кэтээн көрөөччү уонна 15 волонтер үлэлииргэ бэлэмнэр.
Билиҥҥи кэм ирдэбилин тутуһарга элбэх үлэ ыытылла турар. Ол курдук, быыбардыыр учаастактарга дезинфекциялыыр суурадаһыннары биэрдибит. Харыстанар мал бу күннэргэ кэлиэхтээх.
Быыбардыыр хамыыһыйа бэрэссэдээтэллэрин кытта хаста да мунньахтаатыбыт. Суһал боппуруостары тута быһаара олоробут.
Нэһилиэнньэ куоластааһыҥҥа кыттыа дии саныыбын. 2018 сыллаахха дойду бэрэсидьиэнин быыбарыгар Ленскэй нэһилиэгин быыбардааччыларын 69 %-на кыттыбыта.
Ыытыллаары турар уопсай куоластааһыҥҥа тус бэйэм кыттабын уонна Төрүт Сокуоҥҥа киирэр уларытыылары өйүүбүн. Түгэнинэн туһанан, быыбардааччыларбын бэс ыйын 25 күнүттэн саҕалаан от ыйын 1 күнүгэр диэри быыбардыыр учаастаккытыгар кыраапык быһыытынан кэлэн, гражданскай иэскитин толороргутугар ыҥырабын.
Ньургуйаана Иванова, edersaas.ru