«Сахаэнерго» тэрилтэ («Якутскэнерго» ПАУо хампаанньаҕа киирсэр) 17 улууска баар 90 дизель-генераторы өрөмүөннээн, быйылгы былаанын 77% толордо.
Ол курдук, Алдан, Өлүөхүмэ, Өлөөн улуустарыгар бу хайысханан үлэ түмүктэннэ. Ордук элбэх тиэхиньикэни (14 дизель-генераторы) Үөһээ Дьааҥытааҕы электрическэй ситим үлэһиттэрэ өрөмүөннээтилэр, Өймөкөөн РЭС-ин энергетиктэрэ 10 сүрүн оборудованиены бэлэмнээтилэр.
«Сахаэнерго» хампаанньа дизель тэриллэрин өрөмүөннүүр сулууспа салайааччыта Юрий Готовцев иһитиннэрбитинэн, бу күннэргэ Чокурдаахха, Сангаарга, Теплай Ключка, Бэстээххэ (Эдьигээннээҕи РЭС), Эбээххэ, Куйдуһуҥҥа уонна Депутатскайга өрөмүөн үлэтэ салҕанар. Олохтоохтор электричество уотунан толору хааччыллаллар.
Уһук хоту сытар улуустарга саппаас чаастары тиэрдии кэккэ уустуктардаах, сорох сирдэргэ кыһыҥҥы суол турдаҕына биирдэ тиийиэххэ сөп. Ол да буоллар, «Сахаэнерго» үлэһиттэрэ бу сыл бүтүөр диэри өссө 20 дизельнэй оборудованиены чөлүгэр түһэрэр былааннаахтар.
Саргылана Савватеева, «Эдэр саас» сайтка анаан.