Бүгүн 17 кыбартаал Пионерскай уулуссатыгар 200 миэстэлээх «Малышок» оҕо саада аһылынна. Түннүктэн Чочур мыраан көстөр үс этээстээх аныгы уораҕай бассейннаах, физкультуранан уонна музыканан дьарыктанар саалалаах, театральнай, уруһуйдуур устуудьуйалаах, көмпүүтэр кылаастаах. Манна оҕолор английскай тылы үөрэтиэхтэрэ, саахыматтыахтара, дуобаттыахтара, мөлтөхтүк саҥарар кырачааннары логопед, уйулҕа үлэһитэ дьарыктыаҕа.
sakhasire.ru
3000 м2 иэннээх уһуйааҥҥа 11 бөлөх баар буолуоҕа, ол иһигэр төрөппүттэр баҕаларынан оҕолору бэнидиэнньиктэн бээтинсэҕэ диэри төгүрүк суукка көрүөхтэрэ, дьонноро өрөбүллэригэр кэлэн ылыахтара. Мөлтөх доруобуйалаах оҕолору чэбдигирдэргэ санаторнай бөлөхтөр аһыллан үлэлиэхтэрэ.
«Судаарыстыбаннай-чааһынай партнерство чэрчитинэн тутуллар бу тохсус эбийиэк. Өссө биир уһуйаан, оскуола уонна Гагарин аатынан култуура киинэ оҥоһуллара хаалла. Аныгылыы оҥоһуулаах тупсаҕай уһуйааннар биһиги өрөспүүбүлүкэбитигэр элбээн иһиэхтэрэ. Куорат дьаһалтата хаарбах дьиэлэри көтүрдэҕинэ манна аныгы кыбартаал баар буолуохтаах. Ол иһин социальнай эбийиэктэри эрдэттэн тутабыт», — диэн эттэ Ил Дархан Айсен Николаев.
«Малышок» оҕо саадын «ВИС» бөлөх «Газэнергомонтаж” ХЭТ чааһынай партнер уонна инвестор быһыытынан тутан таһаарда. Кырачааннар доруобуйаларын чэбдигирдэр үтүө үгэстээх уһуйаан 95 сылын көрсө ити курдук дьоһун бэлэх оҥоһулунна.
Марианна Тыртыкова, «Саха сирэ», edersaas.ru