Үөрэх дьыла саҕаланара бу кэллэ. Онон сибээстээн, күн бүгүн үөрэх тэрилтэлэрэ сүрүн күүһү өрөмүөн, тутуу үлэтигэр уураллар, хаалбыт аҕыйах күнү баттаһа үлэни үмүрүтэр соруктаахтар.
Быйылгы үөрэх дьылыгар өрөспүүбүлүкэ үрдүнэн 16400 оҕо маҥнайгы кылааска киирэрэ биллэр. Манна даҕатан эттэххэ, улуустан куоракка дьон көһүүтэ үксээн, Дьокуускай куоракка сыллата бастакы кылааска киирэр оҕо ахсаана эбиллэ турар. Быйыл ити сыыппара 5321-гэ тэҥнэстэ.
Саҥа оскуола, уһуйаан
Быйыл Чурапчы улууһун Мырыла сэлиэнньэтигэр оскуола- оҕо саада (90/25 миэстэлээх) тутуллан үлэҕэ киирбитэ. Балаҕан ыйын 1 күнүгэр Кэскил (Томпо), Түбэй Дьаархан (Сунтаар) сэлиэнньэлэригэр 50-нуу миэстэлээх уһуйааннар аһыллыахтара. Эбэн эттэххэ, сыл түмүктэниэр диэри 1553 миэстэлээх 10 оскуола, 2188 миэстэлээх 34 уһуйаан эбийиэгэ тутуллан ааннарын тэлэччи аһыахтара.
Өрөмүөн
Хапытаалынай өрөмүөҥҥэ анаан өрөспүүбүлүкэ хааһынатыттан (7 оскуолаҕа) 10 040,525 тыһ. солк. көрүллүбүт. Кэрэхсэбиллээҕэ диэн – барыта тыа сирин оскуолаларыгар туһаайыллыбыт. Аны федеральнай бүддьүөттэн 697 саҥа миэстэни таһаарарга 114 741,196 тыһ. солк. анаммыт. Өрөспүүбүлүкэ бүддьүөтүттэн 12 749,021 тыһ. солк. улуус кииннэрин 9 уонна Мохсоҕоллоох (Хаҥалас) оскуолаларыгар туһаайыллыбыт. Дойду үрдүнэн оскуолалары биир симиэнэҕэ көһөрөр сорук турар. Ол курдук, 2025 сылга диэри бары биир симиэнэҕэ көһүөхтээхтэр. Биллэрин курдук, билиҥҥитэ икки симиэнэнэн үксүн Дьокуускай куорат итиэннэ улуус кииннэрин оскуолалара үөрэнэллэр. Онон итиннэ улахан болҕомто ууруллар.
Кыһалҕалаах Кангаласс
СӨ Үөрэҕин уонна наукатын министиэристибэтэ иһитиннэрбитинэн, өрөмүөн үлэтэ кыайтарбакка турарынан сибээстээн, Мүрү 1 №-дээх уонна Мохсоҕоллоох оскуолаларын туспа, арыый хойутуу тутуохтара. Оттон Кангаласс бөһүөлэгин оскуолата суут быһаарыытынан сабыылаах турар диэн суруллар. Ааспыт нэдиэлэҕэ СӨ Бырабыыталыстыбатын бэрэссэдээтэлэ Евгений Чекин быйылгы үөрэх дьылыгар оскуолалар төһө бэлэмнэрин туһунан мунньах ыыппыта. Онно сүрүн болҕомтону Кангаласс оскуолатын боппуруоһугар уурбуттара.
Тустаах оскуола 1986 сыллаахха тутуллан үлэҕэ киирбитэ. Кэккэ сылларга төһө да өрөмүөн үлэтэ бардар, кыайтарбатаҕа. Быйыл атырдьах ыйын 10 күнүгэр суут быһаарыытынан сабыллыбыта. Көрүллүбүт үбүнэн оскуола өрөмүөннэниэхтээх, бөҕөргөтүллүөхтээх. Олохтоохтор, төрөппүттэр итиэннэ оскуола кэлэктиибин санааларын истэн баран, өрөмүөн барар кэмигэр, оҕолору бөһүөлэккэ баар дьиэлэргэ үөрэтэр туһунан быһаарыы ылыммыттар.
Итинтэн ураты оскуолалар бары быйылгы үөрэх дьылыгар бэлэмнэрин, үөрэх кэмигэр саҕаланарын этэллэр. Министиэристибэ оскуолалар бэлэмнэниилэрин кыраҕытык кэтээн көрөр, нэһилиэктэр, куораттар баһылыктара кыттыылаах икки төгүллээн селекторынан мунньах ыыппыттара.
Людмила ПОПОВА, “Саха сирэ” хаһыат, edersaas.ru
Хаартыска: интэриниэттэн