Бу күннэргэ, Чурапчытааҕы оҕо спортивнай интэринээт-оскуолата төрүттэммитэ 50 сыллаах үбүлүөйүн бэлиэтээтэ. Үөрүүлээх тэрээһин түгэнигэр сөп түбэһиннэрэн, СӨ Спордун миниистирэ Георгий Балакшин Ксения Наховаҕа международнай гроссмейстер буолбутун туоһулуур дастабырыанньаны туттарда.
Людмила Попова, «Саха сирэ» хаһыат, https://edersaas.ru/
Кылгастык кэпсээтэххэ, Ксения Нахова Өлүөхүмэ улууһун Кыыллаах нэһилиэгиттэн төрүттээх. Остуолтан саҥа өндөйөн эрэр кырачаан Ксюшаны уонна эдьиийин Дашаны аҕалара, технология учуутала Владимир Альбертович Нахов дуобат тумара толоонугар үөрэппитэ. Маҥнай дьиэ иһигэр эрэ, сыыйа-баайа ыкса ыалларын кытта оонньуур, ону ааһан хотуталыыр буолан барбыттара. Кыргыттар салгыы оскуолаларын, улуустарын чиэһин көмүскүүллэрэ. Дуобакка чахчы талааннааҕын көрөн, чулуу тренер Д.П.Коркин төрүттээбит Чурапчытааҕы спортивнай интэринээт-оскуолатыгар төрдүс кылаастан үөрэттэрэ биэрбиттэрэ. Билигин Ксения 10-с кылааска үөрэнэр.
Сэтинньигэ дьахталлар ортолоругар 100 харахтаах дуобакка Европа чөмпүйэнээтигэр кыттан, иккис миэстэни ылбыта. Онон международнай гроссмейстер нуорматын толордо. Бу күннэргэ Ксения үөрэнэр оскуолата 50 сыллаах үбүлүөйүн бэлиэтээтэ.
Эдэр дуобатчыт тренерэ Николай Кычкин: “Ксения сахалартан 12-с киһинэн гроссмейстер буолла. Ксения эһиил алтынньыга Эстония Таллин куоратыгар ыытыллыахтаах дьахталларга аан дойду чөмпүйэнээтигэр бэлэмнэнэр”, — диэн кылгастык санаатын үллэһиннэ.
Манна даҕатан эттэххэ Николай Николаевич үөрэнээччилэриттэн түөрт дуобатчыт гроссмейстер буолла. Ол курдук, Айыына Собакина (2014) Россия гроссмейстера, Матрена Ноговицына (2011), Николай Гуляев (2015), Ксения Нахова (2016) международнай гроссмейстер аатын сүктүлэр.
Людмила ПОПОВА.