Ыам ыйын 11 күнүгэр Владимир Путин 3-15 саастаах оҕолорго, «изоляцияҕа» олоруу кэмигэр көмө быһыытынан, 10 тыһыынча солкуобайы биэрэр туһунан эппитэ.
Бэрэсидьиэн этиитин дорҕооно сүтэ илигинэ, үгүс мунаарар ыйытыылар үөскээн бардылар. Сүрүннээн 16 саастарын туолбут уонна туола илик оҕолоох төрөппүттэр мунаардылар. 16 сааһын кыл-мүлчү туолбут оҕо ылбат дуо? Ыам ыйыгар, бэс ыйыгар 16-тын туолар оҕо ылар дуо? Тоҕо 18 саастарыгар диэри барыларыгар тэҥҥэ биэрбэттэрий, оҕо быраабын кэһии буолбатах дуо, биир кылааска үөрэнэр оҕо оҕоттон туох атыннааҕый, о.д.а. Бэл, петиция оҥоро охсон, илии баттааһынын хомуйан саҕалаатылар.
РФ Үлэҕэ, социальнай сайдыыга министиэристибэтигэр онуоха бу курдук быһаардылар:
— 2020 сыл от ыйын 1 күнүгэр диэри 3 саастарын туолбут, 16 саастарын туола илик оҕолор ылаллар.
Ол эбэтэр, бэс ыйын 30 күнүгэр 16 сааһын туолбут оҕо ылбат, 3 сааһын туолбут оҕо ылар буолан тахсар. Бу боппуруоска өссө да булкуур тахсар кэриҥнээх.
Оттон Gosuslugi.ru порталга маннык суруллан турар: «11.05.2004 сылтан 30.06.2017 сылга диэри кэрчик кэмҥэ төрөөбүт оҕолоох ыаллар хас биирдии оҕоҕо 10 тыһыынча солкуобайы ылар бырааптаахтар».
Ангелина Васильева, «Саха сирэ» хаһыат, edersaas.ru
Хаартыска: интэриниэттэн