Суһал эрэсиим кэмигэр Ил Дархан Айсен Николаев бүгүн киэһээҥҥи иһитиннэриини тиэртэ.
—ЯТЭК топ-менеджерин анаалыһын түмүгэ өссө да биллэ илик. Бүгүн киэһээҥҥэ диэри түмүк биллиэ диэн күүтэбит, — диэтэ.
Ил Дархан маны таһынан коронавируска уорбаламмыт компания биэс үлэһитин анаалыһа сарсын сарсыарда Новосибирскай куоракка бэрэбиэркэҕэ өссө төгүл ыытыллалларын эттэ. Бу дьоннор балыыһаҕа изоляцияҕа сыталларын, бары процедуралар оҥоһуллалларын бэлиэтээтэ. Хантаактаспыт сүүстэн тахса дьону кытта үлэ ыытылла турарын, бу үлэ бүгүн, сарсын түмүктэниэҕин иһитиннэрдэ.
Маны сэргэ, Ленскэйгэ, Нерюнгрига, Мииринэйгэ анаалыстарын туттарбыт дьон түмүктэрэ үчүгэй буолбут. Ону сэргэ, Хаҥаласка, Намҥа, Өлүөхүмэҕэ эмиэ анаалыстар ылыллыбыттара үчүгэй буоларыгар эрэннэ.
Өрөспүүбүлүкэҕэ тыҥаҕа искусственнай вентиляцияны оҥорор 361 аппараакка эбии 36 аппарааты атыылаһар былаан баарын эттэ.
Майтона уонна Индрайвер компанияларга өрөспүүбүлүкэ балыыһаларыгар өйөбүллэрин иһин махтанна.