Олунньу 14-16 күннэригэр Италия киин куоратыгар Римҥэ көҥүл тустууга Европа чөмпүйэнээтэ ыытылынна. Манна саха тустууга оскуолатын иитиллээччилэрэ Ньургун Скрябин (Беларусь) уонна Николай Охлопков (Румыния) ситиһиилээхтик туһуннулар.
Ньургун бу чөмпүйэнээккэ 23-гэр диэри саастаахтарга аан дойду күрэхтэһиитин призера, молдован Максим Сакулцаны ыраастык, аан дойду чөмпүйэнээтин призера, Венгрия аатыттан тустар Исмаил Мусукаевы 12:1 ахсаанынан уонна финалга тахсар иһин киирсиигэ быйылгы Яшар Догу турнирын кыайыылааҕа, азербайджанец Али Рахимзадены 5:1 ахсаанынан кыайталаабыта.Оттон финалга Ньургун Арассыыйаттан сылдьар дагестанец Курбан Шираевка баһыйтаран, иккис миэстэ буолла. Шираев тохсунньуга Красноярскайга буолбут Иван Ярыгин турнирын кыайыылааҕынан буолар. Манна кини 2016 сыллаах олимпийскай чөмпүйүөнү Сослан Рамоновы кыайбыта.
Бу иннинэ Ньургун Скрябин Европа чөмпүйэнээтигэр иккитэ кыттыбыта. 2016 сыллаахха Ригаҕа буолбут күрэхтэһиигэ Арассыыйа аатыттан кыттан, тохсус буолбута. Ол кэнниттэн иллэрээ сыл Каспийскайга ыытыллыбыт чөмпүйэнээккэ Беларусь аатыттан тустубута. Онно боруонса мэтээл иһин киирсиигэ кыл мүччү хотторон, бэһис миэстэҕэ тиксибитэ.
Оттон Румыния аатыттан тустар Николай Охлопковпыт бастакы күн аан дойду чөмпүйүөнэ, грузин Бека Ломтадзеҕа хотторбута. Салгыы Ломтадзе үчүгэйдик тустан, финалга тахсыбыта. Онон, быраабыла быһыытынан, Николай “уоскутар” бөлөххө киирэн, молдован Леонид Колеснигы 6:2 ахсаанынан кыайан, чөмпүйэнээт боруонса мэтээлин иһин тустарга кыаҕы ылбыта.
Бу хапсыһыыга уолбут азербайджанец Интигам Вализадены кытта туһунна. Киирсии бүтэһик сөкүүндэлэригэр Вализаде алҕас хамсаныылары оҥорон, Николай кыайыылаах тахсан, Европа чөмпүйэнээтин боруонса мэтээлин түөһүгэр иилиннэ.
Онон Европа быйылгы чөмпүйэнээтэ саха тустууга оскуолаҕа иитиллээччилэригэр ситиһиилээхтик түмүктэннэ. Ньургун Скрябины, тус тириэньэрин Гаврил Игнатьевы уонна Николай Охлопковы, тус тириэньэрин Владимир Кириллины ситиһиилэринэн эҕэрдэлиибит!
edersaas.ru