От ыйын 9 күнүгэр ойуур баһаардарынан суһал ыстаап киэһээҥҥи мунньаҕын СӨ нэһилиэнньэ олоҕор-дьаһаҕар куттал суох буолуутун хааччыйар судаарыстыбаннай кэмитиэт бэрэссэдээтэлин бастакы солбуйааччы Иннокентий Андросов ыытта.
Экология миниистирин солбуйааччы Сергей Сивцев иһитиннэрбитинэн бүгүн, от ыйын 9 күнүгэр, 16.00 чааска өрөспүүбүлүкэҕэ уопсайа 91 ойуур баһаарын умулларыыга үлэ ыытыллар. Итинтэн 24 тыһ. га иэннээх сири хаппыт 15 баһаар бохсуллубут.
Бүгүҥҥү күҥҥэ уустук быһыы-майгы Горнай, Хаҥалас, Сунтаар, Өймөкөөн оройуоннарын сирдэригэр-уоттарыгар бэлиэтэнэр.
Горнай улууһун Маҕарас сэлиэнньэтиттэн 30 км сиргэ, «Бүлүү» федеральнай суол устун, уоту умуруорууга 70-тан тахса киһи уонна уонтан тахса тиэхиньикэ үлэлиир. Баһаары умуруорарга Бэрдьигэстээхтэн эбии 20 киһи мобилизацияламмыт.
Сунтаар улууһун баһылыгын бастакы солбуйааччы Николай Александров ардаҕы түһэрэргэ былыттар суохтарынан, РФ Оборонаҕа министиэристибэтин уу кутар тэриллээх Ми-8 бөртөлүөтүн оройуоннарыгар баазалыыр боппуруоһу көтөхтө.
Өймөкөөн оройуонун баһылыгын солбуйааччы Раиса Садыкова ойуур баһаара Төрүт нэһилиэгиттэн 4-5 км сиргэ баарын эттэ. Уоту утары 35 киһи охсуһар, оройуон суһал ыстааба нэһилиэнньэлээх пууҥҥа вездеходунан көмөҕө эбии дьону ыыппыт. Баһылыгы солбуйааччы нэһилиэккэ сибээһи тупсарары туруоруста.
+1
+1
+1
+1
+1
+1
+1