Ыам ыйын 13 күнүнээҕи туругунан, өрөспүүбүлүкэҕэ 107 киһи, ол иһигэр Дьокуускайга 59 киһи коронавируһунан ыалдьыбыта бигэргэннэ. Нам, Кэбээйи улуустарыгар ыалдьыы ахсаана эбиллибит – 5-тии киһи ыалдьыбыт. Хаҥалас, Үөһээ Бүлүү улуустарыгар ыалдьыы саҥа түбэлтэлэрэ тахсыбыт.
Өрөспүүбүлүкэтээҕи суһал ыстаап салайааччытын солбуйааччы Ольга Балабкина иһитиннэрбитинэн, суукка иһигэр 15 оҕо ыалдьыбыт. Онон төрөппүттэргэ оҕо доруобуйатын хонтуруоллуулларыгар, дьиэҕэ олорон үөрэнэллэрин, элбэх дьонноох сиргэ сылдьыбаттарын хааччыйар туһунан эттэ. Оскуолалар тэйиччиттэн үөрэххэ көспүттэрэ, эксээмэн туттарар 9,11-с кылаастар бэлэмнэнэллэригэр бары харыстанар миэрэлэри тутуһуохтара.
Барыта 136 тыһыынча вакцина кэлбититтэн, 84,6%-на бэриллибит. 114 933 киһи быһыы бастакы укуолун ылбыт. Кинилэр туруктара үчүгэй.
Ангелина Васильева, “Саха сирэ” хаһыат, edersaas.ru
Хаартыска: sakha.gov.ru