Сайтпытыгар бу дьыл алтынньы 25 күнүгэр «70 киилэ эти уорууга уорбаланар» диэн иһитиннэриибит бэчээттэммитэ. Онно Мэҥэ Хаҥалас улууһугар полиция оперативниктара 70 киилэ эти уорууга уорбаланааччыны биир суукка иһинэн туппуттарын туһунан суруллубута.
Төҥүлү сэлиэнньэтин биир олохтооҕун хоспоҕуттан түүн 70 киилэ ынаҕын этэ сүппүт этэ. Уоруйах ол киһи дьиэтин аттынан ааһан иһэн, хоспоххо ынах этэ кыстанан сытарын көрөн, түүн анаан-минээн тиийэн, хатааһына суох хоспохтон эттэри сүгэн илдьэ барбыт этэ.
Итиниэхэ маарынныыр түбэлтэ аны Нам улууһугар таҕыста. Биир пенсионер 15 киилэ сибиинньэ этин уоран барбыттарын туһунан полицияҕа сайабылыанньа суруйбут.
Барыллаан быһаарыынан, уоруйах киэһэ 22.00 чаас саҕана, дьиэ күүлэтин аанын алдьатан киирэн, ол 15 киилэ эти ылан барбыт. Дьиэлээхтэр кытаанахтык утуйа сытар буолан, туох да тыаһы-ууһу истибэтэхтэр. Сүтүктэрин сарсыныгар биирдэ өйдөөн көрбүттэр.
Бу буруй эмиэ «сылааһына» арыллыбыт – полиция оперативниктара Үөһээ Бүлүүттэн төрүттээх, 31 саастаах, урут киһини ыараханнык эчэтэн сууттана сылдьыбыт киһини суукка иһинэн туппуттар. Уоруллубут эти киниттэн булан былдьаабыттар.
Бу чахчынан «уоруу» ыстатыйанан холуобунай дьыала тэриллибит. Бу 158-с ыст. 2-с чааһынан көрүллэр накаастабыл миэрэ — 5 сылга диэри көҥүлү быһыы.
СӨ ИДьМ-тын пресс-сулууспата:
— Билигин идэһэ өлөрүүтэ саҕаламмытынан, бу кэмҥэ эти уоруу элбиирин туһунан сэрэтэбит. Онон, эккитин-аскытын харайа уурбут сирдэргитин үчүгэйдик хатыыргытыгар сүбэлиибит.
Биһиги корр., «Саха сирэ» хаһыат, edersaas.ru
Хаартыска: интэриниэттэн