Бүгүн, атырдьах ыйын 1 күнүгэр, СӨ Бырабыыталыстыбатын бэрэссэдээтэлин бастакы солбуйааччы Дмитрий Садовников ойуур баһаардарынан суһал ыстаап уочараттаах мунньаҕын ыытта.
Өрөспүүбүлүкэҕэ 149 ойуур баһаара буола турара бэлиэтэнэр. 16 оройуоҥҥа 53 ойуур баһаарын умуруорууга үлэ ыытыллар. Бүгүн киэһээҥҥи иһитиннэриинэн 9 ойуур баһаара бохсулунна, 14 уот умуруорулунна. Оттон Горнай, Кэбээйи уонна Сунтаар улуустарыгар билигин да быһыы-майгы уустуга бэлиэтэнэр.
Ойуур уотун умуруорууга 2226 киһи, 276 тиэхиньикэ үлэлиир. Маны сэргэ, уоту утары үлэҕэ бэйэлэрин баҕаларынан 106 киһи үлэлии сылдьар. Күнтэн-дьылтан тутулуктааҕынан, авиация Кэбээйигэ, Аммаҕа уонна Өлүөхүмэҕэ эрэ үлэлээбитэ этилиннэ.
Гидрометеосулууспа управлениетын билгэлээһининэн атырдьах ыйын 2 күнэ үүнэр түүнүгэр, ол эбэтэр бу түүн, Халыма-Индигир бөлөх оройуоннарыгар уонна Саха сирин соҕуруу өттүгэр ардах түһэрэ сабаҕаланар.
Нэдиэлэ бастакы күнүгэр Өлүөхүмэҕэ уонна Ленскэй оройуоннарыгар ардах түһэрэ күүтүллэр. Онтон атын оройуоннарга кураан, итии күн-дьыл туруо диэн этиллэр.
Ойуур баһаардарын туһунан Үөһээ Бүлүү, Бүлүү, Кэбээйи, Нам, Томпо, Уус Маайа, Горнай улуустарын баһылыктара уонна баһылыгы солбуйааччылара иһитиннэрдилэр.
Түмүккэ бастакы вице-премьер биирдии ойуур баһаара буола турар улуустар салалталарын саамай кылгас кэмнэргэ туох баар күүстэрин түмэн уоту бохсоллоругар уонна умуруоралларыгар ыҥырда. Маны сэргэ, өрөспүүбүлүкэ үгүс улуустарыгар кураан күн-дьыл турарынан, улахан сэрэхтээх буолары тоһоҕолоон эттэ.
+1
+1
+1
+1
+1
+1
+1