Кэнники хонукка 14 ойуур баһаара умуруорулунна.
СӨ Бырабыыталыстыбатын бэрэссэдээтэлин бастакы солбуйааччы Дмитрий Садовников брифиҥҥэ иһитиннэрбитинэн, бүгүҥҥү күҥҥэ эрэгийиэҥҥэ 238 915 га иэннээх сиринэн 23 ойуур баһаара бэлиэтэнэр. 167 664 га иэннээх сиргэ 6 ойуур баһаарын умуруорууга үлэ ыытылла турар.
Биир хонук устатыгар 14 ойуур баһаара умуруоруллубут (117 385 га), 3 ойуур уота бохсуллубут (133 956 га). 38 га иэннээх сиргэ икки ойуур баһаара булуллубут. Ойуур баһаарын умуруорууга 296 киһи, 35 тиэхиньикэ үлэлиир.
Ойуур баһаарын умуруорууга, быһыыны-майгыны мониториннааһыҥҥа, уоту умуруорууга үлэлэһэр тус састаабы көһөрүүгэ, тарҕатыыга өрөспүүбүлүкэ сиригэр-уотугар МЧС 1 салгын аала туһаныллыбыт. Икки көтүү оҥоһуллубут. Нэһилиэнньэлээх пууннарга куттал суоһаабат.
Ойуур уотун өрөспүүбүлүкэ түөрт оройуонугар умуруораллар: Бүлүүгэ, Сунтаарга, Уус Маайаҕа, Чурапчыга.
Быһыы-майгы бигэтийиитинэн көрөн, атын эрэгийиэннэртэн ойуур баһаардарын умуруорууга көмөҕө кэлбит күүстэри таһаарар үлэ тэриллибит. Бүгүн РФ Оборонаҕа министиэристибэтинэн түмүллүбүт инженернэй этэрээти таһаарыы былааннанар.
+1
+1
+1
+1
+1
+1
+1