Доруобуйа Сүрүн Уопсастыба

14-гэр диэри саастаах оҕолор улахан киһитэ суох атыы дьиэлэригэр сылдьаллара көҥүллэммэт

Бэҕэһээ Ил Дархан Айсен Николаев илии баттаабыт ыйааҕар олоҕуран, ыарыынан сибээстээн хааччахтыыр миэрэлэр от ыйын 15 күнүгэр диэри уһаатылар. Бу иннинээҕи хааччахтыыр миэрэлэр бары оннунан хааллалар, ону таһынан, эбии миэрэлэр ылыллаллар.

edersaas.ru

Бастакытынан, Дьокуускай, Мииринэй, Удачнай курдук атын куораттартан рейстэр кэлэр Саха сирин аэропортарыгар дьон температуратын бэрэбиэркэлиэхтэрэ. Этин сылааһа 37,1 кыраадыстан үрдүк дьону Роспотребнадзорга уонна мэдиссиинэ тэрилтэлэригэр ыытыахтара.

Иккис түгэн оҕолорбутун харыстааһыҥҥа туһаайыллар. Биллэрин курдук, оҕолор ортолоругар быһыыны ылыы тарҕаныар диэри, кэккэ миэрэлэр ылыллыбыттара. Күн бүгүн оҕолорго вакцина оҥорор туһуттан чинчийии ыытыллар. Онон оҕолору харыстыыр инниттэн, ыйаахха олоҕуран, 14-гэр диэри саастаах оҕолор улахан киһитэ суох атыы-эргиэн дьиэлэригэр, ырыынактарга, уопсастыбаннай аһатар сирдэргэ сылдьаллара бобуллар.

Хомойуох иһин, өрөспүүбүлүкэҕэ аһыллар кэккэ лааҕырдарга оҕолор ыалдьыбыт түгэннэрэ бэлиэтэнэр. СӨ Үөрэҕин уонна наукатын министиэристибэтэ сөптөөх миэрэлэри ылар”, — диэн бырабыыталыстыба бэрэссэдээтэлин солбуйааччы Ольга Балабкина иһитиннэрдэ.

Коронавирус каартатыгар ыраас турбут Усуйаана улууһугар ыалдьыбыт киһи баара бэлиэтэммит. Ыарыыны миэстэтигэр тиийэр дьон тарҕаталлар, онон сибээстээн, улуус суһал ыстааптара, нэһилиэнньэ ыалдьыбыт дьон ханна сылдьыбыттарын, ыарыы тарҕаныытын кыраҕытык кэтииллэрэ ирдэнэр диэн эттэ.

Суукка устата өрөспүүбүлүкэҕэ 95 киһи ыалдьыбыт:

Дьокуускайга – 59

Мэҥэ Хаҥалас улууһугар – 6

Бүлүү улууһугар –5

Мииринэй, Нерюнгри, Эбээн Бытантай улуустарыгар – түөртүү

Хаҥалас, Чурапчы улуустарыгар – үстүү

Алдан, Нам, Уус Алдан улуустарыгар – иккилии

Усуйаана улууһугар – 1.

Бэс ыйын 25 күнүнээҕи туругунан өрөспүүбүлүкэҕэ 214 117 доза вакцинаны аҕалбыттар. 198 тыһыынча киһи быһыыны ылбыт. Суукка устата өрөспүүбүлүкэ лабаратыарыйалара 3239 анаалыһы оҥорбуттар.

 

Людмила ПОПОВА, “Саха сирэ” хаһыат, edersaas.ru

0
0