Бүгүн СӨ Ил Дархана Айсен Николаев уочараттаах брифинин ыытта. Онно кини аан дойдуга сатыылаабыт коронавирус инфекцията өрөспүүбүлүкэҕэ хайдах туруктааҕын этэригэр, балаһыанньа билигин даҕаны ыгымын ыйда.
Бастаан үтүө сонунтан саҕалыахха. Ыалдьыбыт дьон 65 бырыһыана үтүөрбүт. Бу куһаҕана суох түмүк. Маныаха күннэри-түүннэри сыралаһар эмчиттэр уонна өрөспүүбүлүкэҕэ ылыныллар миэрэлэр оруоллара улахан буолуохтаах. Ол түмүгэр 133 киһи үтүөрбүт.
Ол да буоллар дьаҥҥа хаптарыы 91 саҥа түгэнэ бэлиэтэммит. Бу ааспыт икки нэдиэлэҕэ муҥутуур көрдөрүү. Дьокуускайга 70 киһи ыалдьыбыт. Ону таһынан 4-түү түгэн — Намҥа, Мэҥэ Хаҥаласка, Уус Алдаҥҥа таҕыста уонна кэккэ оройуоннарга биирдии киһи ыалдьыбыт. Муниципальнай оройуоннар онон сибээстээн хааччахтыыр эрэсиими олохтуохтаахтар диэтэ Ил Дархан. Хата, Нам улууһун Салбаҥ сэлиэнньэтигэр эрдэ олохтоммут харантыын уһуллар буолбут. Ыалдьыбыт киһи бэлиэтэммэтэх.
Ил Дархан Айсен Николаев Саха сирин олохтоохторо үөскээбит быһыынан-майгынан болҕомтолорун тус гигиенэҕэ ууруохтаахтарын ыйда. Илиигэ антисептигы туттуу, ыарыһах киһи туспа иһитэ-хомуоһа, маасканы кэтии, алтыһыыны аччатыы…
Кини сыстыганнаах дьаҥ дьиэ кэргэн иһигэр тарҕанарын чорботон бэлиэтээтэ. Бэл, биир ыалтан 7-8 киһи ыалдьыбыт. Ол аата ийэ, аҕа, оҕолор, эбээ, эһээ.
Хомойуох иһин, билигин даҕаны 25 киһи ыарахан туруктаах сытар, кинилэртэн биэс киһи ИВЛ аппараакка холбоммут.
Онон, түмүгэр, ыарыы хаптайарын туһугар бары ирдэбиллэри, хааччахтыыр миэрэлэри тутуһарга Ил Дархаммыт ыҥырда.
Женни СТРЮКОВА
Хаартыскаҕа: А.С.Николаев