Росгвардия полицейскайдара халабырдьыттары туттулар

Ааптар: 
Бөлөххө киир:

Саҥа күн, сырдык сарсыарда куруук туох эрэ үчүгэйи эрэннэрэр курдук эрээри, сороҕор сарсыарда хараҥа быһылааннар, хомолтолоох түбэлтэлэр эмиэ тахсаллар — ол олох кырдьыга.

edersaas.ru

Арааһа, соннук сырдык санаалаах хааман испитэ буолуо биир киһи, «Столичнай» ырыынак таһынан ааһан иһэн.

Онуоха баара, күнэ хара маҥнайгыттан сатамматах — киниэхэ хас да урдус саба түһэн, кырбаан туран, суотабай төлөпүөнүн уонна портмонетын былдьаабыттар. Онно 6 тыһ. солк. харчылааҕа үһү.

Киһини халаабыттарын туһунан иһитиннэрии Росгвардия экипаһыгар эмиэ киирбит. Эмсэҕэлээбит киһи халабырдьыттар хайдах таҥастаахтарын-саптаахтарын, тас көрүҥнэрин ойуулаан биэрбит.

Сотору буолан баран, ориентировкаҕа сөп түбэһэр дьону Дзержинскэй уулуссатыгар көрбүттэр уонна тараччы тутан ылбыттар.

Уорбаланааччылары эмсэҕэлээччи билбитин кэнниттэн, кинилэри полиция отделыгар илдьибиттэр. Суотабай төлөпүөнү биирдэрэ укта сылдьарын булбуттар.

Халабырдьыттар өйдөрүн тута илик «молохочоостор» буолуо дии санаабытым, 38-40 саастаах, олохторун улахан аҥаарын олорбут дьон эбит. Биирдэрэ урут уорууга түбэһэн сууттана сылдьыбыт киһи.

«Халааһын» ыстатыйанан холуобунай дьыала тэриллибитин туһунан РФ Росгвардиятын федеральнай сулууспатын Саха сиринээҕи управлениетын пресс-сулууспата иһитиннэрдэ.

Биһиги корр., «Саха сирэ» хаһыат, edersaas.ru

Хаартыска: РФ Росгвардиятын федеральнай сулууспатын Саха сиринээҕи управлениетын пресс-сулууспата.

+1
0
+1
0
+1
0
+1
0
+1
0
+1
0
+1
0