А.А.Иванов-Күндэ аатынан Кутана уопсай үөрэхтээһин орто оскуолата кулун тутар 18-19 күннэригэр төрүттэммитэ 125 сылын бэлиэтиир.
Надежда ЕГОРОВА, «Саха сирэ» хаһыат, https://edersaas.ru
Сунтаар улууһун Кутана нэһилиэгин орто оскуолата баай историялаах, үгүс үтүө үгэстэрдээх. Бу биллэр-көстөр дьон үөрэнэн, иитиллэн тахсыбыт, дириҥ билиилээх учууталлар үлэлээн ааспыт кыһалара буолар.
Үбүлүөйдээх тэрээһини аан бастаан ыраахтан-чугастан кэлбит ыалдьыттар, оскуоланы араас сылларга бүтэрбиттэр «Дорообо, үөрэппит оскуолам» сэлэлии хаамсыынан арыйыахтара.
Оскуола 125 сыллаах кэрдиис кэмнэрэ ахтыллыбыт «Саргылаах олох кыһата» саҥа кинигэ сүрэхтэниэҕэ. Ыалдьыттар ону сэргэ «Уруйдан, үйэлээх үөрэхпит кыһата», «Ааспыт кэм ахтылҕана» үөрүүлээх чааска мустуохтара.
Үбүлүөй иккис күнүгэр «Алгыс» култуура киинигэр бильярдка, оскуолаҕа лазернай аптамаатынан ытыыга күрэхтэһиэхтэрэ. Оскуола аактабай саалатыгар Кутана орто оскуолатыгар өр сылларга үлэлээбит үлэ, тыыл бэтэрээнэ Марфа Ивановна Николаева туһунан «Ийэбит баар буолан» кинигэни билиһиннэриэхтэрэ.
х х х
Капитон Никифоров дириэктэрдээх (1987 сылтан) Кутана орто оскуолата биллэр суруйааччыларынан, суруналыыстарынан киэн туттар. Манна суруйааччылар Алексей Иванов-Күндэ, Николай Андреев-Түгүннүүрэп, Иван Алексеев, Альберт Бүлүүйүскэй, Уйбаан Нуолур, Варвара Окорокова уо.д.а., суруналыыстар Милан Афанасьев, Валериан уонна Борис Николаевтар, Марта Николаева, Анивера Акимова, Ньургуйаана Хаптасова, Гаврил Андреев, Гея Буртахова уо.д.а. үөрэммиттэрэ. Сунтаар улууһун кулубата Георгий Терешкинтэн саҕалаан (1868-1916 сс.), Александр Акимов, Владимир Крыжановскай (биһиги кэккэбитигэр суох), Руслан Иванов, «Розтор» сүрүн салайааччылара Ивановтар дьиэ кэргэн, Нина Семенова, Лука Егоров, Андрей Тимофеев уо.д.а. бэпэчиитэллэрдээх, меценаттардаах буолан, олоҕу кытары тэҥҥэ хардыылыыр.
Надежда ЕГОРОВА, «Саха сирэ» хаһыат, edersaas.ru