Былырыын доруобуйа харыстабылын салаатыгар “Норуот биһирэбилэ” бириэмийэ туттарыллыбыта номнуо биир сыла буола оҕуста. “Норуот биһирэбилэ” уопсастыбаннай бириэмийэҕэ күрэх быйыл эмиэ саҕаланна.
Бырайыак ааптара Семен Посельскай иһитиннэрбитинэн, бириэмийэҕэ киирсэргэ сайаапкалар муус устар 25 күнүттэн ыам ыйын 20 күнүгэр диэри ылыллаллар. Онтон ыам ыйын 23-31 күннэригэр диэри интерактивнай куоластааһын ыытыллар. Бэс ыйын 16 күнүгэр, Эмчит күнүгэр диэри, кыайыылаахтар быһаарыллыахтара.
Тэрийээччилэринэн СӨ Доруобуйа харыстабылын министиэристибэтэ, “Сахамедстрах” страховой медицинскэй хампаанньа” АУо, “Стерх” өрөспүүбүлүкэтээҕи страховой хампаанньа уонна “СӨ уопсастыбаннай бырайыактары уонна көҕүлээһиннэри өйүүр киин” өрөспүүбүлүкэтээҕи уопсастыба буолаллар.
Куонкуруска медицинскэй тэрилтэлэр бэйэлэрин быраастарын, медицинскэй сиэстэрэлэрин, алын сүһүөх медицинскэй уонна техническэй үлэһиттэрин “Идэҕэ бэриниилээх буолуу”, “Сүрэхпин оҕолорго биэрэбин”, “Биһиги тапталлаах бырааспыт”, “Аһымал санаа сиэстэрэтэ”, “Медицина туһугар” номинацияларынан киллэрэллэр.
Баҕалаахтар zoomatop@mail.ru саайтка анкеталарын уонна ханнык номинацияҕа кытталлара ыйыллыбыт сайаапкаларын ыыталлар. Интэриэһиргиир боппуруостары Николай Захаровка 8(914)290-74-26 нүөмэргэ эрийэн билсиэххэ сөп.
Надежда ЕГОРОВА, “Саха сирэ” хаһыат, edersaas.ru