Социальнай ситимнэр үөдүйүөхтэриттэн, сорох дьон киһиргээн баардарын-суохтарын барытын дьон көрүүтүгэр таһаарар буоллулар. Бу сырыыга хайа эрэ булчуттар 12 туртаһы бултаабыт хаартыскаларын Батсаабынан тарҕаттылар.
Бу хаартыска туһааннаах уорганнар харахтарын далыгар хатанан, арааһа сотору кэмигэр, уора-көстө бултаабыт дьон сокуон иннигэр эппиэтиир буоллулар быһыылаах.
СӨ Айылҕа харыстабылын министиэристибэтин пресс-сулууспата иһитиннэрбитинэн, Батсаапка тарҕаммыт хаартысканан номнуо бэрэбиэркэ саҕаламмыт. Барыллаан ааҕыынан, хоромньу уопсай кээмэйэ 720000 солкуобайынан сыаналаммыт.
РФ Холуобунай кодексатын 258-с ыстатыйатыгар олоҕуран, улахан кээмэйдээх хоромньуну таһааран, сокуоннайа суохтук бултааһын бэлиэтэ баарынан, саһа сылдьан бултаабыт дьоҥҥо холуобунай дьыала тэриллиэн сөбүн туһунан эттилэр.
Анивера АКИМОВА, «Саха сирэ» хаһыат, edersaas.ru сайт