12 сыл анараа өттүгэр Саха сиригэр Ыччат сыла этэ

Ааптар: 
Бөлөххө киир:

Быйылгы сыл илиҥҥи халандаарынан Оҕус сыла. 12 сыл анараа өттүгэр — 2009 сыл өрөспүүбүлүкэҕэ туох сылынан биллэриллибитэй, хайдах ааспытай диэн үгүс киһи интэриэһиргиир буолуохтаах.

edersaas.ru

Саха Өрөспүүбүлүкэтигэр оччолорго Вячеслав Штыров бэрэсидьиэннээн олороро. Ыччаты айар, билимҥэ уонна үлэҕэ кыаҕын арыйаары, дойду социальнай-экэнэмиическэй уларыта тутуутугар сыһыараары, патриотизм тыыныгар иитээри, 2009 сылы Арассыыйаҕа, Саха сиригэр Ыччат сылынан биллэрбиттэрэ. Өрөспүүбүлүкэ бары улуустарыгар, нэһилиэктэригэр Ыччат сылын бырагырааматын ылыммыттара, үгүс тэрээһиннэри ыыппыттара. 2008 сыллаахха 89 уопсастыбаннай холбоһук баар эбит буоллаҕына, 2009 сыл түмүгэр 157 холбоһук баара бэлиэтэммит.

СӨ Бырабыыталыстыбатын гранын иһин ыччат судаарыстыбаннай бэлиитикэтин эйгэтигэр сыллата ыытыллар куонкурус көдьүүстээҕэ көстүбүт. Бырайыактары олоххо киллэриигэ икки төгүл элбэх үп көрүллүбүт. Куонкуруска 32 муниципальнай тэриллииттэн 395 бырайыак киирбититтэн, 82 бырайыак кыайыылааҕынан ааттаммыт. “Ыччат – өрөспүүбүлүкэ инновационнай-стратегическай кыаҕа” дьыалабыай оонньууну сыллата ыытарга быһаарбыттар.

Аан бастакытын “Инновационнай идиэйэ-2009” научнай-тиэхиньиичэскэй бырайыактар өрөспүүбүлүкэтээҕи куонкурустара тэриллибит. Ол түмүгүнэн кыайыылаахтарга 150 тыһыынчалыы солкуобайдаах, Дьокуускайга биисинэс-инкубаторга миэстэ көрөн, 5 граны туттарбыттар.

Төрүт үгэһи тарҕатар инниттэн Мэҥэ Хаҥалас, Хаҥалас, Нам улуустарыгар от охсуутугар “Ыччат күүлэйэ-2009”, “Көмүс хотуур”, “От шоу” өрөспүүбүлүкэтээҕи күрэстэри тэрийбиттэр. Өрөспүүбүлүкэ хамаандата аан маҥнайгытын “Селигер-2009” ыччат, үөрэх Бүтүн Арассыыйатааҕы пуорумугар кыттан үс бырайыкка грант ылбыт. Бүтүн Арассыыйатааҕы устудьуоннар тутар этэрээттэрин хамсааһынын үбүлүөйдээх сийиэһигэр, Саха сирин оҕолоро “Арассыыйа бастыҥ тутар этэрээтэ” ааты ылары ситиспиттэр.

Санатан эттэххэ, быйыл 2021 сылы СӨ Ил Дархана Айсен Николаев Доруобуйа сылынан биллэрдэ. Арассыыйаҕа Билим (наука) уонна технология сыла.

“Саха сирэ” хаһыат, edersaas.ru

+1
0
+1
0
+1
0
+1
0
+1
0
+1
0
+1
0