Сарсыардаттан социальнай ситимнэринэн эмиэ биир үөрүүлээх сонун тилийэ көттө. Ол курдук, Үөһээ Бүлүү улууһун баһылыга Владимир Поскачин, улуустааҕы тыа хаһаайыстыбатын управлениетын начаалынньыга Сергей Иванов тыа хаһаайыстыбатын исписэлиистэригэр “Минскэй” матасыыкыллары туттардылар.
Улуустааҕы тыа хаһаайыстыбатын управлениетын начаалынньыга Сергей Иванов: «Систиэмэни кыратык уларытыахха диэн оптимизация оҥорбуппут. Исписэлиистэрбит бары үөрэҕи бүтэрбит эдэр үлэһиттэр. Урукку управляющайдар атынан сылдьар буоллахтарына, билиҥҥи исписэлиистэргэ матасыыкыл биэрдибит. Исписэлиистэр хонтуораҕа олорон үлэлээбэккэ, бааһыналары, оттуур сирдэри, сайылыктары кэрийдиннэр диэн түҥэтэлээтибит. Бэйэлэрин территорияларын иһигэр – дэриэбинэҕэ “дорожнай карта” оҥорон толору кэрийиэхтээхтэр, билиэхтээхтэр, көрүөхтээхтэр-истиэхтээхтэр, нэһилиэктэрин сайыннарыахтаахтар. Кэлбэт-барбат буоллахтарына баттаспаттар, үлэ тахсыбат», — диэн кылгастык кэпсээтэ.
Үөһээ Бүлүү улууһугар 21 нэһилиэк баарыттан, 12 исписэлиискэ матасыыкыл туттарбыттар. Сорох нэһилиэктэр исписэлиистэрэ иккилии нэһилиэги тутан олороллор эбит. Матасыыкыл массыынатааҕар аҕыйах уматыгы сиир, уопсай суумата даҕаны кыра, саппаас чааһа даҕаны чэпчэки. Онон үөһээ бүлүүлэр табыгастаах ньыманы тобулбуттар.
Людмила ПОПОВА, “Саха сирэ” хаһыат, edersaas.ru