2017 сыллаахха, Ил Дархан Айсен Николаев оччолорго Дьокуускай куорат Аҕа баһылыгынан үлэлии олорон, киин куоракка оҕо уһуйааннарыгар уонна оскуоларга миэстэ тиийбэт буолан, бу сытыы кыһалҕаны быһаарарга элбэх үлэни ыыппыта. Кини судаарыстыба уонна чааһынай баай-дуол бииргэ үлэлээһин ситимигэр олоҕурбут хамсааһыны саҕалаабыта.
Ол курдук, Саха Өрөспүүбүлүкэтин бырабыыталыстыбата, Дьокуускай куорат дьаһалтата уонна “ВИС” бөдөҥ тэрилтэ бииргэ үлэлээһиҥҥэ сөбүлэһиигэ илии баттаспыттара. Ол түмүгэр бүгүҥҥү күҥҥэ Дьокуускай куоракка 12 улахан социальнай суолталаах тутуу үлэҕэ киирдэ.
Ол курдук, Туймаада хочотугар 2018 сыллаахха 550 миэстэлээх «Айыы кыһата» оскуола, Яков Потапов аатынан уулуссаҕа 350 оҕо үөрэнэр 25 №-дээх оскуола, Ильменскэй уулуссаҕа уонна Сыырдаах сэлиэнньэтигэр 240 оҕо сылдьар оҕо уһуйааннара, 203 микро-оройуоҥҥа 315 миэстэлээх оҕо уһуйаана, 300 миэстэлээх оҕо айымньытын дьиэтэ уонна аныгы ирдэбиллэргэ толору эппиэттиир бибилэтиэкэ үлэҕэ киирбиттэрэ.
Оттон былырыын Автодорожнай уулуссаҕа 500 оҕо үөрэнэр 6 №-дээх оскуола, 203 микро-оройуоҥҥа 315 миэстэлээх оҕо уһуйаана, Пионерскай уулуссаҕа 200 миэстэлээх 30 №-дээх оҕо уһуйаана олохтоохтор үөрүүлэригэр ааннарын тэлэччи арыйбыттара.
Быйылгы үөрэх дьыла саҕаланыытын көрсө өрөспүүбүлүкэ араас муннуктарыттан кэлэн, 220 оҕо үөрэнэр Арктикатааҕы норуоттар икки ардыларынааҕы оскуола арыллыбыта. Оттон балаҕан ыйын 13 күнүгэр Юрий Гагарин аатынан Култуура дьиэтин үөрүүлээхтик аһыы сиэрэ-туома ыытыллыахтаах. Маннык элбэх тутуу Уһук Илин федеральнай уокурукка Саха сиригэр эрэ үлэҕэ киирдэ. Онон биһиги өрөспүүбүлүкэбит сайдыы саҥа кэрдииһигэр таҕыста.
Родион Кривогорницын, «Саха сирэ» хаһыат, edersaas.ru