Ыам ыйын 11 күнүнээҕи туругунан, 119 дьиэ кэргэн быйыл төрөөбүт оҕолоругар ылбыт “100 сыл оҕолоро” хапытаал үбүн туһаннылар. Уопсай суумата 11,8 мөлүйүөн солкуобай буолла.
Төрөппүттэр сүрүннээн олорор усулуобуйаларын тупсарыыга уонна тырааныспары атыылаһарга ыыталлар. Ол курдук, олорор усулуобуйаны тупсарыыга, дьиэ өрөмүөнүгэр 82 ыал (уопсай суумата – 8,1 мөлүйүөн солкуобай), тырааныспары атыылаһарга 35 ыал (3,4 мөлүйүөн солкуобай) ыыппыттар. Биир ыал оҕо аатыгар уурунуу кылаатын арыйбыт, өссө биир ыал кэтэх хаһаайыстыбатын сайыннарыыга туһаммыт.
Билиҥҥи туругунан, сыл саҕаланыаҕыттан 3484 оҕо төрөөбүт, ол гынан баран, 100 тыһыынча солкуобай суумалаах “100 сыл оҕолоро” хапытаалы ыларга 2454 сайаапка киирбит.
“100 сыл оҕолоро” хапытаал Ил Дархан Айсен Николаев ыйааҕынан, 2022 сыл тохсунньу 1 күнүттэн ахсынньы 31 күнүгэр диэри төрөөбүт оҕолорго барыларыгар бэриллэр. Сэртипикээти ыларга сайабылыанньа да суруйар наадата суох. Оттон хапытаал үбүн туһанарга сайабылыанньаны электроннай көрүҥүнэн, эбэтэр, социальнай көмүскэл управлениетын нөҥүө биэриэххэ сөп.
Ангелина Васильева, “Саха сирэ” хаһыат, edersaas.ru
Хаартыска: sakhagov.ru