Тохсунньу 20 күнүнээҕи туругунан, ааспыт суукка устата балыыһаҕа 116 киһи, ол иһигэр 7 оҕо “ковид” диэн диагнозтаах киирдэ. Кинилэртэн 10 киһи олус ыарахан туруктаах диэн өрөспүүбүлүкэтээҕи суһал ыстаап иһитиннэрэр.
Ол курдук, Дьокуускай куорат балыыһаларыгар 87 киһи, Мэҥэ Хаҥаласка – 10, Горнайга, Уус Алдаҥҥа – 3-түү, Алдаҥҥа, Өлүөхүмэҕэ, Хаҥаласка – 2-лии, Үөһээ Бүлүүгэ, Бүлүүгэ, Намҥа, Нерюнгригэ, Ньурбаҕа, Өймөкөөҥҥө, Сунтаарга – 1-дии киһи киирдилэр.
Суукка иһигэр барыта 761 киһи ыалдьыбыт.
Балыыһаҕа сытар, олус ыарахан туруктаах 66 киһи баарыттан, быраастар 10 киһи олоҕун быыһыырга күнүстэри-түүннэри охсуһаллар. Бу 10 киһи бары да коронавируһу утары быһыыны ылбатахтар эбит.
“Омикрон” штамм кэлэн, сыстыһыы олус элбээтэ, онон төһө кыалларынан, элбэх дьонноох сиргэ сылдьыбакка, харыстанар миэрэлэри күүһүрдэргитигэр ыҥырабыт.
Ангелина Васильева, “Саха сирэ” хаһыат, edersaas.ru