11 оҕо Биир кэлим эксээмэни 100 баалга суруйда

Бөлөххө киир:

Бастакынан ыытыллыбыт Биир кэлим эксээмэннэр түмүктэрэ билиннилэр. Өрөспүүбүлүкэ үрдүнэн нуучча литературатыгар уонна химияҕа 11 үөрэнээччи 100 баалга суруйда. Бу оҕолор 100-түү тыһыынча солкуобайы ылыахтара.

Дьэ, ханнык оскуола оҕолоро муҥутуур баалы ылбыттарый? Бу оҕо, төрөппүт, учуутал 11 сыллаах сыралаах үлэтин түмүгэ буолар.

Нуучча литературатыгар 8 оҕо 100 баалга суруйбут, кинилэр Дьокуускай куорат 26-с, 7-с №-дээх оскуолаларын, киин куорат классическай гимназиятын, Томмот 7-с №-дээх, Ленскэй оройуонун 4-с №-дээх, Эльдикан орто оскуолатын, Өктөмнөөҕү научнай-үөрэтэр киини, Мииринэй оройуонун 26-с №-дээх оскуолатын бүтэрбиттэр.

Химияҕа 3 оҕо 100 баалга суруйбут: 3-с №-дээх Нерюнгри гимназиятын, Дьокуускай куораттааҕы лиссиэй уонна Н.А. Алексеева аатынан Техническэй лиссиэй үөрэнээччилэрэ.

Кинилэри Ил Дархан Айсен Николаев эҕэрдэлээтэ:

Биһиги оҕолорбут – маладьыастар! Бу күн аайы кыһамньылаах үлэ түмүгэ, учууталлар уонна төрөппүттэр өҥөлөрө эмиэ улахан. Бу оҕолор бастакынан 100-түү тыһыынча солкуобайы ылыахтара. Бу наҕараадалара улахан олох аартыгар дьоһун үктэл буолуохтун!

Ил Дархан Саха АССР 100 сылынан бу төлөбүрү Биир кэлим эксээмэҥҥэ 100 баалы ылбыт үөрэнээччилэргэ олохтообута. Хас да биридимиэккэ 100 баалы ыллахтарына, төлөбүр биридимиэт ахсын бэриллэр.

Ангелина Васильева, “Саха сирэ” хаһыат, edersaas.ru

Хаартыска: СИА.

+1
0
+1
0
+1
0
+1
0
+1
0
+1
0
+1
0