11 кылаас оҕолоругар үп-харчы уонна экэниэмикэ боппуруостарыгар олимпиада кыайыылаахтара билиннилэр
11 кылаас үөрэнээччилэрин ортолоругар үп-харчы уонна экэниэмикэ боппуруостарыгар ыытыллыбыт өрөспүүбүлүкэтээҕи үбүлүөйдээх V олимпиада түмүктэннэ. Тэлэбиисэринэн түмүктүүр түһүмэххэ саамай үрдүк баалы хомуйбут 14 кыттааччы ыҥырыллыбыта. Бу биэс сыл тухары, уопсайа, сүүһүнэн оҕо кытынна. Оҕо ахсаана эбиллэ турар итиэннэ географията кэҥээн иһэр.
СӨ үп-харчы миниистирэ Валерий Жондоров тэрийээччилэр олимпиада усулуобуйатын бүгүҥҥү күн ирдэбилигэр эппиэттиир гына сыллата уларытан иһэллэр диэн эттэ. Информационнай технология уонна информатизация аныгы үйэҕэ ханнык баҕарар өҥө эйгэтигэр исписэлиистэн саҥалыы көрүүнү ирдиир. Оттон маныаха күүстээх каадырдары бэлэмнээһин оскуола сылларыттан саҕаланыахтаах.
Олимпиада оскуола үөрэнээччилэрэ, кинилэр учууталлара, төрөппүттэрэ үп-харчы, экэниэмикэ боппуруостарыгар быһаарса үөрэнэллэрин туһугар ыытыллар. Үс ыйдаах интеллектуальнай марафон түмүгэр, оҕолор тэлэбиисэринэн финалга тахсаллар.
“Маннык олимпиада оҕоҕо улахан быраактыканы биэрэр. Сыллата кыттааччы ахсаана, географията эрэ кэҥиир буолбатах. Оскуола саастарыттан үп-харчы боппуруостарынан интэриэһиргиир, экэниэмикэ туһунан номнуо өйдөбүллээх оҕолор бэлэмнэниилэрин хаачыстыбата тупсан иһэр. Олимпиада кинилэргэ аттаран толкуйдуу, дьон-сэргэ уонна камера иннигэр саҥара үөрэнэллэригэр сүрүн тирэҕинэн буолар. Ааспыт сылларга үс иһигэр киирбит оҕолор устудьуоннуур кэмнэригэр өрүү көхтөөхтөрүн, сыалларын-соруктарын ситиһэргэ дьулуһалларын көрдөрдүлэр итиэннэ наукаҕа, уопсастыбаннай олоххо, үөрэхтэригэр ситиһиилэрдээхтэр”, — диэн экэниэмикэ миниистирин солбуйааччы Владимир Сивцев бэлиэтээтэ.
Олимпиада сүүмэрдиир түһүмэҕэ быйыл аан бастакытын Дьокуускайдааҕы үөрэх порталын нөҥүө ааста. Кытаанах сүүмэрдээһини уонна икки түһүмэҕи ааһан, финалга Дьокуускай куораттан уонна өрөспүүбүлүкэ араас муннуктарыттан 14 саамай киэҥ билиилээх оҕо кыттар чиэскэ тигистэ. Тэлэбиисэринэн бүтэһик түһүмэххэ оҕолор тиэрмиҥҥэ билиилэрин, чопчу түгэннэргэ анаалыстыыр дьоҕурдарын, тиэмэлэринэн тыл этиилэрин көрдөрдүлэр.
Кыайыылаахтар:
1 м – Марина Аюшеева, Дьокуускай куорат, М.К.Аммосов аатынан ХИФУ финансаҕа-экэниэмикэҕэ институтугар тус сыаллаах миэстэнэн үөрэххэ киирэр путевканы тутта
2 м – Ян Контогоров, Сунтаар улууһа
3 м – Саргылана Борисова, Нам улууһа.
Олимпиада СӨ үп-харчы, экэниэмикэ, үөрэх уонна наука министиэристибэлэрин, М.К.Аммосов аатынан ХИФУ тэрийиилэринэн ыытыллар.
СӨ үөрэх уонна наука министиэристибэтин сайтыттан.