Халаан уутуттан, ойуур баһаардарыттан сылтаан буолар ыксаллаах быһыы-майгы үөскүүр түгэнигэр диэн муниципальнай саппаас пуондатыгар 108 мөлүйүөн солкуобайы хаһааннылар.
Ону сэргэ, бу сыалга-сорукка анаан 150 мөлүйүөн солкуобай өрөспүүбүлүкэ пуондатын хааһынатыттан көрүллүбүт. Нэһилиэнньэ олоҕор-дьаһаҕар куттала суох буолууну хааччыйар судаарыстыбыаннай кэмитиэт бэрэссэдээтэлин бастакы солбуйааччы Иннокентий Андросов, муниципальнай үөрэхтээһин, куорат уокуруктарын уонна нэһилиэктэргэ анаан баһаар сезонугар бэлэмнэнии сэминээригэр санаатын үллэһиннэ. Кини этэринэн, суһал быһыыны-майгыны сэрэтэр уонна ону туоратарга ыытыллар үлэлэргэ анаан эрэгийиэннээҕи бырабыыталыстыба саппааһын мөлүйүөн суумалаах пуондата бэлэмнэммитин иһитиннэрдэ. Олохтоох салайыныы уорганнара 108 мөлүйүөн солкуобайы таһынан аска-үөлгэ, мэдиссиинэҕэ анаан 167 мөлүйүөнү бэлэмнээбиттэрин эттэ.
Сэминээргэ муниципальнай үөрэхтээһин бэрэстэбиитэллэригэр ойуур баһаарын умуоруууга тэрээһин үлэтин, миэрэлэри ылыы бэрээдэгин быһаардылар. Сүрүннээн федеральнай сокуоҥҥа олоҕурбутунан, “айылҕа баһаара” уонна “ойуур баһаара” диэн саҥа өйдөбүллэр киирбиттэр. Эрдэ федеральнай сокуон таһымыгар маннык чопчу быһаарыылар суохтара. Билигин эрэгийиэннээҕи былаас уорганнара ойуур баһаарыттан ураты айылҕа баһаарын умуруорар тэрээһини тэрийэр боломуочуйалаахтар.
Сиһилии бу туһунан сэминээр кыттыылаахтарыгар айылҕа баһаарын умуруоруу үлэтин тэрийии бэрээдэгин, суһал быһыы-майгы эрэсиимин уонна бу зоналарын быһаарыы, суһал ыстааптары тэрийии туһунан кэпсээтилэр. Маны таһынан, туспа болҕомтону уоту тохтотор минерализованнай балаһаларга уурдулар. Бэлиэтээн эттэххэ, бу сыл ойуур баһаарыттан тыаны харыстыырга туһуламмыт федеральнай үбүлээһин 5 — 6 төгүл үрдээбитэ. Ол эбэтэр 1, 6 миллиардка тэҥнэспитэ. Икки төгүл үбүлээһини үрдэтии эрэгийиэн бүддьүөтүттэн эмиэ көрүллүбүтэ. Айылҕа уонна ойуур баһаарын сэрэтэр уонна умулларар үлэҕэ 2 миллиард солкуобайы ыытыахтара.
Ульяна ЗАХАРОВА.