102 саастаах сэрии бэтэрээнэ Солоҕоҥҥо олорор

Бөлөххө киир:

Кыайыы 77 сылынан Горнай улууһун баһылыга Никита Андреев Солоҕоҥҥо олорор Аҕа дойдуну көмүскүүр Улуу сэрии кыттыылааҕа, 102 саастаах Михаил Дьячковскайы дьиэтигэр тиийэн, эҕэрдэлээбитэ.

Никита Викторович ытык киһиэхэ Махтал тылларын этэн туран, Улуу Кыайыы 77 сылынан, Саха АССР төрүттэммитэ 100 сылынан анал бэлиэни, Ил Дархан Айсен Николаев эҕэрдэтин, Махтал суругун туттарда. Бу курдук баһылык сыл аайы кэлэн эҕэрдэлиирэ үтүө үгэскэ кубулуйда.

Үөрүүлээх тэрээһиҥҥэ Солоҕон нэһилиэгин баһылыга Алексей Захаров, Савва Тарасов аатынан оскуола дириэктэрэ Прокопий Тимофеев, «Көлүкэчээн» ырыа ансаамыбыла кэлэн, тыл этэн, ыллаан-туойан эҕэрдэлээтилэр.

Михаил Михайлович Дьячковскай 1943 сыллаахха сэриигэ ыҥырыллыбыта. Украинскай фронт 4-с танковай батальонугар, стрелковай ротаҕа сулууспалаабыта. Айылҕаттан мындыр, хоһуун буолан, разведкаҕа сырытыннараллар этэ. Хаста да ыстыыгынан киирсиигэ кыргыспыта, хаста да бааһырбыта. Германияны кыайбыт кэннэ, Монголияҕа дьоппуон милитаристарын кытары сэриилэспитэ.

1945 сыл атырдьах ыйыгар Хайлары ыларга снарядка түбэһэн, контузияламмыта. Эмтэнэн баран, Харбин, Чангуй диэн кытай куораттарын босхолооһуҥҥа кыттыбыта. Ол кэннэ Хотугу Корея Пхеньян куоратыгар икки сыл сулууспалаабыта. Онон дойдутугар 1947 сыллаахха этэҥҥэ эргиллэн кэлбитэ.

Ангелина Васильева, “Саха сирэ” хаһыат, edersaas.ru

Хаартыска: sakhagov.ru.

+1
0
+1
0
+1
0
+1
0
+1
0
+1
0
+1
0