Кыайыы 77 сылынан, үлэ, духуобунай сайдыы миниистирэ Елена Волкова уонна Дьокуускай куорат дьаһалтатын социальнай көмүскэл управлениетын салайааччы Семен Матвеев “Үйэ саас” ытык бэлиэ хаһаайката, тыыл бэтэрээнэ Татьяна Семеновна Сафоноваҕа дьиэтигэр тиийэн, эҕэрдэлээтилэр.
Татьяна Семеновна 1921 сыл тохсунньу 1 күнүгэр Өлүөхүмэ улууһун Дабаан сэлиэнньэтигэр төрөөбүтэ. Нөөрүктээйи оскуолатын бүтэрэн баран, 1941 сыллаахха тырахтарыыстар куурустарыгар үөрэнэн, эдэркээн кыыс холкуоска үлэлээн барбыта. Сэрии сылларыгар тырахтарыыстар биригээдэлэрин салайбыта, мэхээнньигинэн эмиэ үлэлээбитэ.
1946 сыллаахха Аҕа дойдуну көмүскүүр сэрии кыттыылааҕа Иннокентий Афанасьевич Хохоловка кэргэн тахсыбыта. Эдэр ыал Дабааҥҥа көһөн олохсуйбуттара. Татьяна Семеновна биэнсийэҕэ тахсыар диэри “Молотов” холкуос биригээдэтигэр учуотчугунан, дьааһыла-саад сэбиэдиссэйинэн үлэлээбитэ. Ол курдук, күүстээх санаалаах, сытыы-хотуу буолан, туох да үлэттэн толлубакка, эр дьону кытары тэҥҥэ үлэлээн, сэрии ыар сылларыгар Кыайыыны уһансыбыта.
Икки кыыс оҕолорун иитэн-улаатыннаран, элбэх сиэннэнэр, хос сиэннэнэр, хос-хос сиэннэнэр дьолу билбиттэрэ. Татьяна Семеновна 9 сиэнин, 17 хос сиэнин, 10 хос-хос сиэнин ааттарын ааҕа билэттиир, билигин да күннэтэ кэпсэтэ, сүбэлии-амалыы, көмөлөһө олорор. Киниэхэ киһи хайдах да 101 сааһы биэрбэт, билигин да эрчимнээх, кыайарынан дьиэ иһигэр үлэлиир, дьарыктанар. Кини хаһан да санаатын түһэрбэт, олоххо тардыһыылаах, үөрэ-көтө сылдьар киһи.
Елена Волкова уонна Семен Матвеев ытык кырдьаҕаска “САССР 100 сыла” үрүҥ көмүс бэлиэни уонна сибэкки дьөрбөтүн, өйдөбүнньүк бэлэхтэри туттардылар. Татьяна Семеновна баҕатынан, 1-кы кылааска киирбит үс хос-хос сиэнигэр өйдөбүнньүк чаһылары бэлэх ууннулар. Бу курдук, эбэлэрэ бэйэтин бырааһынньыгар да сиэннэрин туһугар кыһалла олорор.
Үйэ саастаах тыыл бэтэрээнигэр өссө да чэгиэн-чэбдик сылдьан, оҕолорун, сиэннэрин тапталларыгар сууланан, үөрдэ-көтүтэ олороругар баҕардылар.
Ангелина Васильева, “Саха сирэ” хаһыат, edersaas.ru
Хаартыска: sakhagov.ru