Саха АССР 100 сыла

101 саастаах Акулина Мартыноваҕа үбүлүөйдээх бэлиэни туттардылар

Саха АССР төрүттэниитин сылын кытта тэҥ саастаах сэрии, үлэ бэтэрээнэ, Нам улууһун бочуоттаах олохтооҕо, «Үйэ саас» ытык бэлиэ хаһаайката, Граф Биэрэгин олохтооҕо Акулина Петровна Мартынова, лоп курдук, биир үйэни олорон кэллэ.

Акулина Петровна быйыл тохсунньуга 101 сааһын бэлиэтээбитэ. Киниэхэ бу күннэргэ “Саха АССР 100 сыла” диэн өрөспүүбүлүкэ үбүлүөйдээх Бочуоттаах бэлиэтин туттардылар. Бу Бочуоттаах бэлиэ дастабырыанньатыгар Ил Дархан Айсен Николаев илии баттыыр. Бэлиэни уонна   дастабырыанньаны улуус баһылыга Юрий Слепцов дьиэтигэр баран туттарда. Бочуоттаах бэлиэни туттарыыга Хатыҥ Арыы нэһилиэгин баһылыга Иван Ноговицын, Хатыҥ Арыы дьаһалтатын сүрүннүүр специалиһа Надежда Сивцева, улуустааҕы социальнай харалта управлениетын сүрүннүүр специалиһа Анастасия Баишева сырыттылар.

Акулина Петровна 1921 сыллаахха Орджоникидзевскай оройуонугар төрөөбүтэ. Колхуостааһын кэмигэр учуотчутунан үлэлээбитэ. 2-с Хомустаахха сэбиэдиссэйдии сылдьан маҕаһыын туттарбыт үтүөлээх, атыы-эргиэн киинигэр үтүө суобастаахтык үлэлээн олоҕун анаабыта. Кэргэнэ Хирсан Софроновичтыын 5 оҕону төрөтөн хос-хос сиэҥҥэ тиийэ ийэ-аҕа ууһун тэниппит дьоллоох дьон.

Хайа да киһитээҕэр олох-дьаһах кытаанах кэмнэрин көрсөн кэлбит ытык-мааны киһибитин автономия 100 сылынан, самаан сайын Үрүҥ Тунах Ыһыаҕынан э5эрдэлээтилэр, оҕолоругар, чугас дьонугар үтүөнү баҕардылар, махтал тылларын эттилэр.

“Нам улууһа” МТ пресс-сулууспата

0
0
Telegram @edersaas20