Сүрүн Уопсастыба

«1000 тэлгэһэ» бырайыакка кыттарга тиэтэйиҥ

Эһиил, 2022 сылга, Саха Өрөспүүбүлүкэтэ тэриллибитэ 100 сылын бэлиэтиэхпит. Бу бэлиэ тэрээһиҥҥэ анаан  «1000 тэлгэһэ» диэн бырагыраамаҕа кыттарга  Саха сирин олохтоохторуттан этиилэри ылыы саҕаланна.

Санатар буоллахха,  121 тэлгэһэни тупсаран оҥорууга  федеральнай бүддьүөттэн 846 мөлүйүөн солкуобай көрүллэр. Куонкуруска муниципальнай тэриллиилэртэн  1000 киһиттэн элбэх нэһилиэнньэлээх сэлиэнньэлэр кытталлар.

Ил Дархан  Айсен Николаев  өрөспүүбүлүкэ олохтоохторо бырайыагы дьүүллэһиигэ кытталлара хайаан да наадалааҕын ыйар.  Тоҕо диэтэххэ,  нэһилиэктэригэр баар тэлгэһэлэр хайдах-туох тупсарыллан оҥоһуллалларын олохтоохтор бэйэлэрэ быһаарыахтара. Онон сибээстээн,  өрөспүүбүлүкэбит төрүттэммитэ 100 сылыгар  нэһилиэктэргэ  тупсаҕай оҥоһуулаах тэлгэһэлэр баар буолуохтара.

«Уһук Илиҥҥи уокурукка 1000 тэлгэһэ»  бырайыак сыалынан   эдэриттэн саҕалаан саастаах дьоммутугар бары өттүнэн сөп түбэһэр  тэлгэһэлэри, сири-уоту оҥоруу буолар», —  диэн Ил Дархан иһинэн архитектураҕа уонна тутууга управлениетын  салайааччы Ирина Алексеева  быһаарар. Биэдэмистибэ куонкурус балаһыанньатын оҥорбут. Тэрээһиҥҥэ  үөһэ этэн аһарбыппыт курдук, муниципальнай тэриллиилэртэн  1000 киһиттэн элбэх нэһилиэнньэлээх  уонна төгүрүк сыл устата суоллаах-иистээх сэлиэнньэлэр кытталлар. Олохтоохтор талалларыгар аналлаах үс бырайыак баар буолуоҕа. Бырайыактарга  сырдатыы, көҕөрдүү үлэлэриттэн саҕалаан  хаамалларыгар хааччахтаах дьоҥҥо аналлаах гына тэлгэһэлэр тупсарыллан оҥоһуллуохтаахтара барыта баар, ыйыллар. Ону тэҥэ, тэлгэһэлэр маассабай успуордунан  дьарыктанарга бары өттүнэн табыгастаах буолуохтаахтар.

Сайаапканы хомуйуу бастакы түһүмэҕэ ахсынньы 5 күнүгэр диэри уһатылынна. Бырайыакка аналлаах этиилэри Oneclick Yakutia платформаҕа киирэн ыытыаххытын эбэтэр олохтоох салалтаҕа суругунан тиксэриэххитин эмиэ сөп. Иккис түһүмэх ахсынньы 6 күнүттэн 12 күнүгэр диэри барар. Ити болдьоххо муниципальнай тэриллиилэр  бырайыак  докумуонун бэлэмнээн,  архитектураҕа уонна тутууга управлениетыгар тиксэриллиэхтээх.

Хаартыска: Ил Дархан уонна Бырабыыталыстыба дьаһалтатын пресс-сулууспата.

 

 

 

0
0
Telegram Whatsapp