Бүгүн Саха сирин олохтоохторо «Хомусист-виртуоз мира» диэн аан дойдутааҕы III куонкуруһу көрсө улахан түһүлгэни тэрийэн, күргүөмүнэн тахсан хомустаатылар. Аахсыйа Саха АССР тэриллибитэ 100 сылыгар ананна.
Ил Дархан Айсен Николаев бу иннинэ хомус саха норуотун национальнай култууратын ураты символынан, саха норуотун духуобунай баайынан, Саха сирин ураты брендинэн буоларын туһунан эппитэ.
Дьокуускай куорат Орджоникидзе болуоссатыгар улахан куонкурус аһыллыыта буолуон иннинэ 300-тэн тахса киһи сахалыы таҥас-сап кэтэн туран, хомуска оонньоон иһитиннэрдилэр. Тэрээһиҥҥэ куонкурус кыттааччылара, дьүүллүүр сүбэ чилиэннэрэ, Арассыыйа эрэгийиэннэриттэн уонна омук дойдуларыттан кэлбит ыалдьыттар кытыннылар. Анал аахсыйаҕа ВКС-эрэсиимин көмөтүнэн Саха сирин 15 улууһа уонна куората кыттан, хомуска тэбис-тэҥҥэ оонньоотулар.
Кыттааччылар бары хомуска оонньоон, оһуохай ырыатын таһаардылар. Хомус сүрүн дьүрүскэнин аан дойдутааҕы хомус мусуойун уонна киинин бэрэсидьиэнэ Иван Алексеев – Хомус Уйбаан, аан дойду таһымнаах виртуоз-хомусчуттар Альбина Дегтярева, Спиридон Шишигин, Ким Борисов таһаардылар.