Биллэрин курдук, олунньу 25 күнүттэн «Кинотавр» киинэ фестивалын муҥутуур кыайыылааҕа буолбут, «Меридианы Тихого» диэн АТР дойдуларын аан дойдутааҕы киинэ фестивалларын «Көрөөччү биһирэбилэ» бириис хаһаайына, Норвегияҕа ыытыллыбыт норуоттар икки ардыларынааҕы киинэ фестивалын бирииһин ылбыт режиссёр Дмитрий Давыдов устубут «Пугало» киинэтэ көрөөччү дьүүлүгэр таҕыста.
Бу күн биллиилээх режиссёр Дьокуускайга Арктикатааҕы норуоттар икки ардыларынааҕы оскуолаҕа сылдьан, «Улахан киһиттэн оҕо 100 ыйытыыта» бырайыак иитинэн оскуола үөрэнээччилэрин кытта көрүстэ. Көрсүһүүгэ киинэҕэ сүрүн оруолу толорбут, «Дьахтар оруолун бастыҥ толорооччу» бирииһинэн наҕараадаламмыт Валентина Романова-Чыскыырай, киинэ оператора Иван Семенов, устар бөлөх ыалдьыттаатылар.
Көрсүһүү олус иһирэхтик ааста. Оҕолор режиссёр олоҕун, айар үлэтин туһунан ыйыталастылар, киинэ хайдах уһулларыттан саҕалаан режиссёр биир кэлим эксээмээҥҥэ сыһыаныгар тиийэ интэриэһиргээтилэр. Ол мээнэҕэ буолбатах. Ыалдьыт оскуолаҕа ыкса сыһыаннаах, алын кылаас учууталынан, дириэктэри солбуйааччынан, дириэктэринэн үлэлии сылдьыбыт буолан, оҕолор киниэхэ чугас тиэмэни ыйыталастылар. Оскуола олоҕун туһунан кини «Костер на ветру» диэн киинэтигэр устубута.
Дмитрий кэпсээбитинэн, барыта кыраттан саҕаламмыт. Бастаан кылгас видеороликтары, онтон «короткометражкалары» устууттан саҕалаан улахан киинэҕэ тиийбит. Киинэ дьоруойдарынан боростуой дьон, сүрүннээн, урут бииргэ үлэлээбит дьоно буолбуттар. Күннээҕи олоҕу хайдах баарынан көрдөрүү, бу саха киинэтин уратыта буолар диэн, Дмитрий санаатын үллэһиннэ. Оттон киинэҕэ сурун оруолун толорооччу, этно-хайысхалаах ырыаһыт Валентина Романова-Чыскыырай билиммитинэн, оруол кинини бэйэтэ булбут. Клибин көрөн баран, режиссёр туох да саарбаҕа суох, кинини эрэ устарга санаммыт.
Киинэ оператора Иван Семенов айар дьылҕата оҕолору эмиэ олус интэриэһиргэттэ. Кини төһө да эдэр буоллар, номнуо 29 киинэни устубут. Киинэ эйгэтигэр кинини соһуччу түгэн аҕалбыт. Ыалдьыттар оҕолорго, кыранан муҥурдаммакка, туруоруммут сыалы-соругу, баҕа санааны ситиһэргэ туохтан да чаҕыйбакка, дьаныардаахтык дьулуһалларыгар баҕардылар. Киинэ атын дьоруойдара бары иллэҥ кэмнэригэр Амматааҕы норуот театрыгар дьарыктаналларын туһунан кэпсээтилэр.
Режиссёр уонна оператор санааларынан, улахан киһилии дьоһуннаах саамай интэриэһинэй ыйытыыны биэрбит Эрчим Порохонько Дмитрий Давыдов автографтаах постер тутан, үөрүүтэ үксээтэ.
Түмүккэ ыалдьыттар оҕолорго саха киинэтин таптыырга, төрөөбүт дойдуга бэриниилээх буоларга баҕардылар. Оттон биһиги киинэ айар бөлөҕөр ситиһиилээх премьераны уонна аны аан дойду таһымнаах айымньылаах үлэни баҕара хаалыаҕыҥ!