А.С. Пушкин аатынан Национальнай бибилэтиэкэҕэ «Саха АССР 100 сылыгар — 100 уопсастыбаннай көҕүлээһин» диэн кинигэ биһирэмэ буолла.
2016 сыллаахха өрөспүүбүлүкэ бырабыыталыстыбата 100 уопсастыбаннай көҕүлээһиҥҥэ куонкурус биллэрбитэ. Бу үлэни түмэн кинигэ таһаарарга быһаарбыттара.
— 2016 сылтан ыытыллыбыт куонкуруска гражданскай актыыбынас холобурун көрдөрбүт 28 улуустан 194 бастыҥ көҕүлээһин кыттыбыта. 224 сирэйдээх кинигэҕэ өрөспүүбүлүкэ, улуус, үлэ кэлэктииптэрин таһымыгар ыытыллыбыт 100 бырайыак киирдэ, ㅡ диэн бэлиэтээтэ. Уопсастыбаннай балаата аппараатын салайааччыта, редакционнай кэллиэгийэ кыттыылааҕа, 2019-2021 сылларга ыччат дьыалаларын уонна социальнай коммуникациялар миниистирин солбуйааччы Надежда Мохначевская.
Кинигэ биһирэмигэр Витим летопиһын оҥоруу, «Мэнэн тэрэн» эбээн тылын үөрэтии оскуолатын тэрийии, Мэҥэ Хаҥалас улууһун Хара нэһилиэгэр уотунан сырдатыллар сыыры дабайар кирилиэс оҥоһуллуутун, «Доруобай ийэ — доруобай оҕо» мэдиссиинэ бырагырааматын олоххо киллэрии уо.д.а. бырайыактары олоххо киллэрбит салайааччылар санааларын атастастылар, үлэлэрин сырдаттылар.
Холобура, Мэҥэ Хаҥалас улууһун Хара нэһилиэгин баһылыга Дария Назарова олохтоохтор үгүстэрэ Майа сэлиэнньэтигэр үлэлииллэрин бэлиэтээн туран, «киин уулуссаҕа тиийэргэ сыыры түһэргэ-тахсарга эрэйдэнэллэрэ» диэн кэпсээтэ.
Олохтоох волонтердар бу сыырга кирилиэс оҥорбуттарын, дьаһалта онно уотунан сырдаппытын кэпсээтэ.
Баһылык уопсастыбанньыктар көҕүлээһиннэрэ билигин олохтоохторго олус туһалыырын бэлиэтээтэ.
Эбээннэр ассоциацияларын чилиэнэ Наталья Сметанина норуот төрүт тылын билэрин туһугар тылы билэр дьон бэйэлэрин тула дьону мунньан, уус-уран тылга, ускуустуба, фольклор нөҥүө үөрэтэллэрэ көдьүүстээҕин туһунан бэртээхэй видео-презентацияны оҥорон кэпсээтэ.
Ыччат дьыалаларыгар уонна социальнай коммуникациялар миниистирэ Петр Шамаев бу кинигэ иитэр суолтатын бэлиээтэ уонна атын да социальнай бырайыактары көҕүлүүр аналлааҕын бэлиэтээтэ.
Миниистир «1500 экземпляр кинигэттэн 500-һэ мунниципальнай бибилэтиэкэлэргэ бэрилиннилэр», — диэтэ.
Елена ПОТОЦКАЯ, «Саха сирэ» хаһыат.
Хаартыска — СИА уонна ааптар куйаар ситиминэн буолбут кинигэ биһирэмиттэн түһэриитэ.