Доруобуйа Маны аах

Быһыыны ылбыттар 100 тыһыынчалаах оонньууга кыттыахтара

Бырабыыталыстыба коронавирустан быһыы ылбыттарга харчынан бирииһи оонньотуу быраабылатын бигэргэттэ.

Арассыыйаҕа ковид-19 коронавирус дьаҥыттан харыстанан быһыы ылбыт гражданнары биһириир бырагыраама тахсыаҕа. Бу туһунан уураахха Бырабыыталыстыба Бэрэссэдээтэлэ Михаил Мишустин илии баттаата. Бириистэри сүүйүүгэ 18 үөһээ саастаахтар кыттыахтара.

Бу тэрээһин 2021 сыл балаҕан ыйын 1 күнүттэн ахсынньы 1 күнүгэр диэри ыытыллыаҕа, маныаха быһыыны ылбыттар Биир кэлим регистрдэригэр олоҕуруохтара.

Лотерея операторынан “Гознак” аахсыйалаах уопсастыба буолуоҕа. Бириистэри лотерея дьиҥнээх саайтыгар  бонусзаздоровье.рф оонньотуохтара. Түмүктэри бу саайтка уонна сонуннары киэҥник тарҕатар ситимнэргэ таһаарыахтара.

“Быһыыны ылбыттары өйүүр бырагырааманы киллэрэн, Бырабыыталыстыба бэйэлэрин уонна чугас дьонун доруобуйатыгар кыһаммыт дьоҥҥо махталын биллэриэҕэ”, — диэтэ бу ылыныллыбыт быһаарыы туһунан вице-премьер Татьяна Голикова.

Лотерея ыытыллар кэмигэр компьютер түбэһиэх талыы алгоритмынан кыайыылаахтары иккитэ быһаарыаҕа. Уопсайа 1000 кыайыылааҕы быһаарыахтара. Хас биирдии киһи 100-түү тыһыынча солкуобайы ылыаҕа. Лотерея түмүгүн анал тираж хамыыһыйата быһаарыаҕа.

Бириис туһунан иһитиннэрии гражданин тус порталыгар уонна муниципальнай өҥө порталыгар (ЕПГУ) тахсыаҕа уонна кыайыылаахха push-иһитиннэрии көмөтүнэн ыытыллыаҕа.

Сүүйүү туһунан иһитиннэриини ыларга уонна уу харчы түһүөхтээх баан каартатын биэриигэ ЕПГУ-га бигэргэммит бэлиэтэнии баар буолуохтаах уонна иһитиннэриини ылан баран, үс ыйы хойутаабакка ЕПГУ-га тус кэбиниэккэ МИР бааныҥ каартатын нүөмэрин ыйыахтааххын.

Баан реквизиттэрин бигэргэтии кэннэ уу харчынан бириис кыайыылаах счетугар киириэҕэ. Бириистэри оонньотуу кэннэ алта ый устата төлүөхтэрэ.

РФ Бырабыыталыстыбатын саайтыттан.

4
0