Чурапчы улууһугар үөрүүлээх быһыыга-майгыга саҥа төрөөбүт оҕолору төрүүр дьиэттэн таһаардылар.
Тус сыаллаах «100 сыл оҕолоро» диэн 100 тыһыынча солкуобай суумалаах ийэ хапытаалын тохсунньу 2 күнүгэр кыыс оҕону төрөппүт ийэ тутта. Бэлиэтээн эттэххэ, саҥа төрөөбүт оҕолору П.Н.Сокольников аатынан улуустааҕы киин балыыһаттан таһаардылар.
СӨ Ил Дархана Айсен Николаев анал этиитигэр Саха АССР үбүлүөйдээх сылынан уонна 2022 сыл өрөспүүбүлүкэҕэ Ийэҕэ анаммытынан, бу сылга төрөөбүт хас биирдии оҕо маннык 100 тыһыынчалаах сэртипикээти ылыаҕа диэн эппитэ.
Ахсынньы 30 күнүгэр бу ыйаах өрөспүүбүлүкэ тус сыаллаах хапытаала диэн бигэргэтиллэн баттаммыта. Ол курдук «100 сыл оҕолоро» диэн бу сылга Саха сиригэр оҕоломмут эбэтэр оҕо иитэ ылбыт ыал маннык сэртипикээтинэн туһанар буолар.
Ульяна ЗАХАРОВА.