Дьокуускай куораттааҕы социальнай көмүскэл управлениетыгар “100 сыл оҕолоро” хапытаал үбүн туһанарга сайабылыанньалар киирэн эрэллэр. Бастакынан Ивановтар уонна Поповтар дьиэ кэргэттэрэ биэрдилэр.
Алена, Степан Ивановтар быйыл тохсунньу 19 күнүгэр Виталина диэн кыыстара төрөөбүтэ. Кинилэр хапытаал 100 тыһыынча солкуобайын ипотека сорох чааһын эрдэ төлүүргэ ыыппыттара.
Марина, Геннадий Поповтарга тохсунньу 21 күнүгэр үһүс оҕолоро төрөөбүтэ. Кинилэр бу үбү дьиэлэрин өрөмүөнүгэр ыыттылар.
—— Биһиги 2019 сылтан чааһынай дьиэ туттабыт. Силигэ ситэрэ кыра хаалла. Онон “100 сыл оҕолоро” хапытаал киирэрин олус үөрэ истибиппит. Онон бу үбү туһанан, дьиэбит ис бараанын ситэрэргэ-хоторорго кыах үөскээтэ, — диэн ийэлэрэ Марина Ивановна этэр.
Бу сыл бастакы кыбаарталыгар “100 сыл оҕолоро” хапытаал 1577 оҕоҕо анаммыта. Ону тэҥэ, быйыл 640 дьиэ кэргэн үһүс оҕолоругар Өрөспүүбүлүкэтээҕи ийэ хапытаалын ылар бырааптаннылар. Ол курдук, Дьокуускайга – 231 ыал, Мииринэйгэ, Нерюнгригэ – 34-түү, Мэҥэ Хаҥласка 26 ыал Өрөспүүбүлүкэтээҕи ийэ хапытаалын ылбыттар диэн СӨ үлэҕэ, социальнай сайдыыга министиэристибэтэ иһитиннэрэр.
Санатар буоллахха, дьиэ кэргэн бу хапытаалы бааҥҥа уурдарыы кылаатын арыйарыгар, оҕо үөрэнэригэр, үрдүк технологиялаах мэдиссиинэ көмөтүн ыларыгар, мэдиссиинискэй-социальнай реабилитацияны ааһарыгар, өрөспүүбүлүкэ тас өттүгэр санаторий-куруорт эмтэниитигэр, эмтэри атыылаһарга, Арассыыйа иһигэр дьиэ кэргэнинэн сынньана барарга, олорор дьиэ усулуобуйатын тупсарыыга, тырааныспар атыылаһарга, дьиэ өрөмүөнүгэр, кэтэх хаһаайыстыбаны сайыннарыыга, ол иһигэр тыа хаһаайыстыбатын тиэхиникэтин атыылаһарга, оҕо олоҕун уонна доруобуйатын страховкалыырга туһаныан сөп.
Ангелина Васильева, “Саха сирэ” хаһыат, edersaas.ru
Хаартыска: sakhagov.ru