Сүрүн Уопсастыба

«100 сыл оҕолоро» хапытаалы ким туохха туһанна?

2021 сыл түмүгүнэн Саха сирэ оҕо төрөөһүнүн ахсаанынан Уһук Илиҥҥэ инники миэстэҕэ, Арассыыйаҕа сэттис миэстэҕэ сылдьыбыта.

edersaas.ru

Онтон 2022 сыл сэттэ ыйын түмүгүнэн өрөспүүбүлүкэҕэ   6 452 оҕо төрөөтө, кинилэртэн уола  – 3362, кыыһа – 3090.  Биллэрин курдук, кинилэр бары Саха сирин Ил Дархана Айсен Николаев бигэргэппит  “Сүүс сыл оҕолоро” хапытаал 100 тыһыынча солкуобайын ылыахтара.

Атырдьах ыйын 1 күнүнээҕи туругунан, “Сүүс сыл оҕото” тус сыаллаах хапытаалы биэрэр туһунан  4 455 быһаарыы ылылынна.

Атырдьах ыйын 1 күнүгэр 662 ыал тус сыаллаах хапытаал үбүн туһанна (уопсайа 61 мөлүйүөнтэн тахса солкуобай суумалаах). Тус сыаллаах хапытааллаах ыал ордук олорор дьиэни тупсарарга уонна тырааныспар атыылаһарга туһанна. Арай, алта ыал тус хаһаайыстыбатын тупсарарга туһанна, биэс ыал оҕо туһатыгар кирэдьиит тэрилтэлэригэр  уурунуу арыйда.

Санатан эттэххэ,  100 тыһыынча суумалаах “Сүүс сыл оҕолоро” тус сыаллаах хапытаал 2022 сыл тохсунньу 1 күнүттэн 2022 сыл ахсынньы 31 күнүгэр диэри төрөөбүт оҕолорго бэриллэр. Төрөппүттэр РФ гражданнара буолуохтаахтар уонна оҕо төрөөбүтүн туһунан сибидиэтэлистибэни  ЗАГС уорганнарыттан ылыахтаахтар.

Тус сыаллаах хапытаалы ыларга төрөппүттэр сайабылыанньа суруйаллара наадата суох,  оҕо төрөөбүтүн туһунан сибидиэнньэлэргэ  олоҕуран оҥоһуллар. Онтон тус сыаллаах хапытаалы туһанар быраабы ылар туһунан  биллэрии кэллэҕинэ, СӨ Үлэҕэ уонна социальнай сайдыыга министиэристибэтин социальнай көмүскэлгэ уонна үлэҕэ  упраавлениетыгар сайабылыанньа суруйаллар.  Судаарыстыбаннай өҥөлөр  порталларын эмиэ туһаныахха сөп.

Надежда ЕГОРОВА, «Саха сирэ», edersaas.ru

0
0
Telegram @edersaas20