Ыам ыйын саҕаланыыта өрөспүүбүлүкэҕэ 2310 ыал “100 сыл оҕолоро” хапытаал сэртипикээтин ылбыта. Кинилэртэн 104 ыал хапытаал 100 тыһыынча солкуобайдаах үбүн номнуо туһаннылар.
Ыаллар бу үбү сүрүннээн олорор усулуобуйаларын тупсаралларыгар уонна тырааныспары ыларга туһаналлар эбит. Ол курдук, 68 ыал хапытаалы дьиэни атыылаһарга, өрөмүөннүүргэ, 34 ыал тырааныспары ыларга ыыппыттар. Өссө 2 ыал оҕо аатыгар уурунуу кылаатын арыйбыттар уонна кэтэх хаһаайыстыбаны сайыннарыыга ыыппыттар.
“100 сыл оҕолоро” хапытаал Ил Дархан Айсен Николаев ыйааҕынан, 2022 сыл тохсунньу 1 күнүттэн ахсынньы 31 күнүгэр диэри төрөөбүт оҕолорго барыларыгар бэриллэр. Сэртипикээти ыларга сайабылыанньа да суруйар наадата суох, оҕо ЗАГС управлениетыгар регистрацияланна да, ананар. Оттон хапытаал үбүн туһанарга сайабылыанньаны электроннай көрүҥүнэн, эбэтэр, социальнай көмүскэл управлениетын нөҥүө биэриэххэ сөп. Бу төрөппүттэргэ олус табыгастаах.
Ангелина Васильева, “Саха сирэ” хаһыат, edersaas.ru
Хаартыска: sakhagov.ru