“100 сыл оҕолоро” хапытаал сууматыттан 30 тыһыынча солкуобайы харчынан ылан туһаныахха сөп буолла. Бу туһунан ыйаахха Ил Дархан Айсен Николаев илии баттаата.
Бу хапытаалы 2022 сыл тохсунньу 1 күнүттэн ахсынньы 31 күнүгэр диэри төрөөбүт оҕолоох ыаллар ылаллар. Суумата – 100 тыһыынча солкуобай. Саха АССР 100 сылынан уонна Ийэ сылынан Ил Дархан саҥа оҕолонор дьиэ кэргэттэргэ бэлэх, көмө быһыытынан, олохтообута.
30 тыһыынча солкуобайы ылан туһаныахтарын баҕарар дьон олорор сирдэринэн социальнай көмүскэл управлениетыгар, эбэтэр Элбэх өҥөнү оҥорор кииҥҥэ (МФЦ) тиийэн, ону тэҥэ, www.e-yakutia.ru порталга онлайн көрүҥүнэн сайабылыанньа суруйуу ирдэнэр. Сайабылыанньаны 2023 сыл кулун тутар ыйыгар диэри биэриэххэ сөп.
Хапытаал ордубут сууматын, эбэтэр бүтүннүүтүн олорор усулуобуйаны тупсарарга, тырааныспары ыларга, Арассыыйа иһигэр сынньанарга, оҕону үөрэттэрэргэ, эмтэтэргэ, страховкалатарга, эми-тому атыылаһарга, киниэхэ уурунуу харчы кылаатын арыйарга, уо.д.а. ыытыахха сөп.
Бүгүҥҥү туругунан, хапытаалы ылбыт ыаллартан 140 дьиэ кэргэн туһаммыт, ол иһигэр 98 дьиэ кэргэн олорор усулуобуйатын тупсарарга, 40 дьиэ кэргэн – тырааныспары атыылаһарга ыыппыттар.
Ангелина Васильева, “Саха сирэ” хаһыат, edersaas.ru
Хаартыска: sakhagov.ru