Саха Өрөспүүбүлүкэтин ытык кырдьаҕаһа Татьяна Семеновна Сафонова бүгүн 100 сааһын туолла. Саха сирин олохтоохторугар Саргылаах саҥа сылынан эҕэрдэтин тиэрдэр.
Татьяна Семеновнаны эҕэрдэлээри төлөпүөннээбиппэр, бэйэбин: “Саҥа дьылынан эҕэрдэлиибин”, — диэн соһутта, үөртэ.
Уһун үйэлэнии кистэлэҥэ тугуй? “Бастатан туран, эбээбит эдэриттэн чөл олоҕу тутуһар. “Хамсаныы – олох” диэн өрүү этэр. Күн бүгүҥҥэ диэри билэр дьонун кытта кэпсэтэ, билсэ турар, сонуну барытын билэ олорор. Өрүү биһигини салайар, сүбэлиир.
Иккиһинэн, кытаанах санаалаах. Ханнык даҕаны үлэттэн, ыарахантан чаҕыйан турбат, илиитин ыһыктыбат, санаатын түһэрбэт. Отунан-маһынан эмтэнэригэр: “Бу миэхэ олох көмөлөһөр диэн баран истэххэ хайаан даҕаны көмөлөһөр” диир.
Үсүһүнэн, дьоҥҥо үтүө, ыраас санаалаах буолуохтааххыт диэн үөрэтэр” – диэн улахан сиэнэ, эбэтигэр иитиллибит, эбэтин аатын сүгэр Татьяна Гаврильевна Аржакова, Татьяна Семеновна уһун үйэлэниитин үс кистэлэҥин үллэстэр.
Ону тэҥэ, урут минньигэһи букатын сиэбэтэ үһү. Көннөрү, судургу аһылыгынан аһыыр эбит. Өлүөхүмэттэн төрүттээҕин быһыытынан, эдэригэр үксүн хортуоппуй сиир эбит, куртахха ыарахан диэн кэлин сааһыран тохтоппут. Аны бу доруобуйаҕа буортулаах дии санаатаҕына сыалааҕы-арыылааҕы сиэбэт, сиир да буоллаҕына чыычаах өлүүтүн саҕаны амсайар эбит.
“Саҥа 2021 сылынан Саха сирин олохтоохторун эҕэрдэлиибин. Хаһан даҕаны санааҕытын түһэримэҥ. Өрүү инникигэ эрэллээх буолуҥ”, – диэн бүгүн 100 сааһын туолбут Татьяна Семеновна Сафонова баҕа санаатын тиэрдэр.
100 саастаах Ытык кырдьаҕаска “Үйэ саас” диэн бочуоттаах бэлиэни, РФ Бэрэсидьиэнин, СӨ Ил Дарханын, СӨ Үлэ уонна социальнай сайдыы министиэристибэтин аатыттан эҕэрдэлэри уонна бэлэхтэри туттардылар.
Олоҕун олуктара:
1921 сыллаахха тохсунньу 1 күнүгэр Өлүөхүмэ улууһун Дабаан сэлиэнньэтигэр төрөөбүтэ.
1932 сыллаахха 2-с Нөөрүктээйи оскуолатыгар киирэр.
1940 сыллаахха 7 кылаастаах оскуоланы бүтэрбитэ. Ити сыл Дьокуускайга Потребкооперация тиэхиньикумугар үөрэнэ киирбитэ. Доруобуйатынан, үөрэҕин бүтэрбэккэ дойдутугар төннөр.
1941 сыллаахха хомсомуол путевкатынан Абаҕатааҕы МТСка тырахтарыыстар куурустарын бүтэрэр.
1941 сыл от ыйыттан 1944 сыллаахха диэри 2-с Нөөрүктээйигэ “Карл Маркс” аатынан колхуоска тырахтарыыһынан үлэлиир.
1944 сыл тохсунньутуттан 1945 сыл тохсунньутугар диэри Дьокуускайга Наркомзем иһинэн Механизация оскулатыгар үөрэнэр.
1945-1946 сылларга Абаҕатааҕы МТСка учаастактааҕы мэхээнньигинэн үлэлиир.
1946 сыллаахха Дабааҥҥа көһөн барар, Хохолов Иннокентий Афанасьевичка кэргэн тахсар.
1946-1963 сылларга Дабааннааҕы “Молотов” аатынан колхуоска хонуу биригээдэтин учуоччутунан үлэлиир.
1963-1970 сылларга Дабааннааҕы дьааһыла-саадка сэбиэдиссэйдиир.
1970-1971 сылларга Дабааннааҕы “Димитровскай” колхуоска сүөһү иитэр биригээдэҕэ биригэдьиирдиир.
1971 сыллаахха Дабаан сэлиэнньэтин Кочегаровотааҕы сельскэй сэбиэт бэрэссэдээтэлинэн талыллар.
1979 сылтан бочуоттаах сынньалаҥҥа олорор.
Людмила ПОПОВА, “Саха сирэ” хаһыат, edersaas.ru